Čyhunačniki z Homiela pavinšavali žančyn z 8 Sakavika i ŭzarvali tyktok
Niečakanymi zorkami sacsietak napiaredadni 8 Sakavika stali supracoŭniki Biełaruskaj čyhunki. Mužčyny z homielskaha adździaleńnia zamiest tradycyjnych bukietaŭ vyrašyli zrabić padarunak u inšym farmacie: uziali hitary, barabany, akardeon i zapisali videa z muzyčnym vinšavańniem dla svaich kaleh-žančyn.
Rolik chutka raźlacieŭsia pa tyktoku i inšych sacsietkach i nabraŭ užo bolš za 800 tysiač prahladaŭ.
Na kadrach mužčyny hrajuć na muzyčnych instrumientach i śpiavajuć žartaŭlivuju pieśniu-vinšavańnie:
«Niachaj horad viedaje biez sumnieńnia —
najlepšyja žančyny ŭ našym adździaleńni».
Za asnovu čyhunačniki ŭziali žartaŭlivuju pieśniu «8 Marta hdie?» rasijskaha hurta Patrick Cash & Friends. Tekst jany pierapisali pad svaju pracu i kalektyŭ, dadaŭšy miascovyja detali i vinšavańni dla kaleh. Atrymałasia amal karparatyŭnaja bałada — pra pracoŭnyja źmieny, kalektyŭ i žančyn, jakija kožny dzień pracujuć pobač.
«Zrabili padarunak usim žančynam»
Videa apublikavali ŭ tyktoku, i za karotki čas jano sabrała sotni tysiač prahladaŭ. Pad rolikam źjavilisia dziasiatki paviedamleńniaŭ ad žančyn-čyhunačnic z roznych haradoŭ Biełarusi, jany dziakujuć vykanaŭcam za nastroj i vinšavańnie. U kamientaryjach pišuć, što takoje vinšavańnie atrymałasia niečakana ciopłym i značna bolš zapaminalnym za tradycyjnyja kvietki.
Niekatoryja karystalniki adznačajuć, što heta pieśnia pieraplunuła aryhinał, i navat rajać čyhunačnikam nie spyniacca na adnym roliku i zapisvać novyja pieśni. Inšyja žartujuć, što paśla hetaha vystupu ŭ Biełaruskaj čyhunki źjaviŭsia ŭłasny bojz-bend.
«Chłopcy, vy zrabili padarunak usim žančynam Biełarusi. Dziakuj!», — napisała adna z karystalnic.
Videa było tolki častkaj vinšavańnia. Toj samy muzyčny numar čyhunačniki vykanali i ŭžyvuju na stadyjonie «Łakamatyŭ» u Homieli, dzie prajšło śviatočnaje mierapryjemstva dla supracoŭnikaŭ.
Ciapier čytajuć
Kab nie płacić padatak na sabak, minčuki pačali zdavać ich u punkty adłovu32
Kamientary