Чыгуначнікі з Гомеля павіншавалі жанчын з 8 Сакавіка і ўзарвалі тыкток
Нечаканымі зоркамі сацсетак напярэдадні 8 Сакавіка сталі супрацоўнікі Беларускай чыгункі. Мужчыны з гомельскага аддзялення замест традыцыйных букетаў вырашылі зрабіць падарунак у іншым фармаце: узялі гітары, барабаны, акардэон і запісалі відэа з музычным віншаваннем для сваіх калег-жанчын.
Ролік хутка разляцеўся па тыктоку і іншых сацсетках і набраў ужо больш за 800 тысяч праглядаў.
На кадрах мужчыны граюць на музычных інструментах і спяваюць жартаўлівую песню-віншаванне:
«Няхай горад ведае без сумнення —
найлепшыя жанчыны ў нашым аддзяленні».
За аснову чыгуначнікі ўзялі жартаўлівую песню «8 Марта где?» расійскага гурта Patrick Cash & Friends. Тэкст яны перапісалі пад сваю працу і калектыў, дадаўшы мясцовыя дэталі і віншаванні для калег. Атрымалася амаль карпаратыўная балада — пра працоўныя змены, калектыў і жанчын, якія кожны дзень працуюць побач.
«Зрабілі падарунак усім жанчынам»
Відэа апублікавалі ў тыктоку, і за кароткі час яно сабрала сотні тысяч праглядаў. Пад ролікам з’явіліся дзясяткі паведамленняў ад жанчын-чыгуначніц з розных гарадоў Беларусі, яны дзякуюць выканаўцам за настрой і віншаванне. У каментарыях пішуць, што такое віншаванне атрымалася нечакана цёплым і значна больш запамінальным за традыцыйныя кветкі.
Некаторыя карыстальнікі адзначаюць, што гэта песня пераплюнула арыгінал, і нават раяць чыгуначнікам не спыняцца на адным роліку і запісваць новыя песні. Іншыя жартуюць, што пасля гэтага выступу ў Беларускай чыгункі з’явіўся ўласны бойз-бэнд.
«Хлопцы, вы зрабілі падарунак усім жанчынам Беларусі. Дзякуй!», — напісала адна з карыстальніц.
Відэа было толькі часткай віншавання. Той самы музычны нумар чыгуначнікі выканалі і ўжывую на стадыёне «Лакаматыў» у Гомелі, дзе прайшло святочнае мерапрыемства для супрацоўнікаў.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі21
Каментары