Новай прэс-сакратаркай Белага дома стане Кэці Закарыя, якая працавала з Трампам на выбарах
Трамп назваў яе вернай прыхільніцай.
Кансерватыўнай палітычнай аглядальніцы Кэці Закарыя прапанавалі пасаду прэс-сакратаркі Белага дома. Дональд Трамп назваў яе «вернай паплечніцай» і «адданай удзельніцай руху MAGA», піша Бі-бі-сі.
«Раней яна ўдзельнічала ў маіх выбарчых кампаніях, дапамагаючы працаваць у ключавых «хісткіх» штатах, дзе мы атрымалі перамогу», — напісаў Трамп у Truth Social.
«Я ўпэўнены, што на пасадзе прэс-сакратаркі Белага дома Кэці дасягне значных вынікаў на карысць нашай краіны, бо яна карыстаецца павагай прадстаўнікоў СМІ і амерыканскага народа, а таксама зможа наладзіць выдатнае супрацоўніцтва як з прэсай і грамадзянамі ЗША, так і з маёй адміністрацыяй».
Закарыя падзякавала Трампу ў сацыяльнай сетцы X: «Служыць прэзідэнту Трампу і амерыканскаму народу ў гэты найважнейшы гістарычны момант — калі краіна адзначае сваё 250‑годдзе — для мяне найвялікшы гонар».
Закарыя, якая цяпер працуе дарадцай па камунікацыях у кампаніі Trump Media&Technology Group, стане шостай па ліку афіцыйнай прадстаўніцай прэзідэнта за час яго дзвюх адміністрацый.
Раней яна непрацяглы час займала пасаду прэс-сакратаркі Міністэрства ўнутранай бяспекі (DHS).
Былая прэс-сакратарка Белага дома Кэралайн Левіт, якая пакінула пасаду ў жніўні, як паведамлялася на гэтым тыдні, пераходзіць на працу ў тэлекампанію Fox News.
42‑гадовая Кэці Закарыя часта выступае ў эфіры кансерватыўных тэлеканалаў Newsmax і Fox News і актыўна ўдзельнічае ў палітычнай дзейнасці Рэспубліканскай партыі. У прыватнасці, у 2006 годзе, калі прэзідэнтам ЗША быў Джордж Буш-малодшы, яна праходзіла стажыроўку ў Нацыянальным камітэце Рэспубліканскай партыі і ва Упраўленні па палітычных пытаннях Белага дома.
Згодна з яе профілем у LinkedIn, з чэрвеня яна займае пасаду старэйшай дарадцы па камунікацыях у медыякампаніі Трампа і на платформе Truth Social. У Міністэрстве ўнутранай бяспекі яна прапрацавала зусім нядоўга — з лютага па сакавік гэтага года.
Закарыя даўно і актыўна абараняе прэзідэнта Трампа і палітыку яго адміністрацыі.
У чэрвеньскім інтэрв'ю Бі-бі-сі яна спрачалася з крытыкай на адрас Трампа з нагоды правядзення ў Белым доме бою турніру па змешаных баявых мастацтвах UFC, заявіўшы, што прынцыпы UFC — гэта «тыя самыя прынцыпы, на якіх была заснаваная наша канстытуцыйная рэспубліка».
«Гаворка пра тое, каб не спыняць барацьбу да самага канца, — сказала яна. — Думаю, няма лепшага ўвасаблення амерыканскага духу, чым добры бой UFC».
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі9
Каментары