Лукашэнка: Хто будзе прэзідэнтам ва Украіне, вырашыць украінскі народ. Гэта не пытанне Трампа
«Не трэба дыктаваць».
Аляксандр Лукашэнка выказаўся наконт заявы Дональда Трампа пра неабходнасць змяніць Уладзіміра Зяленскага, піша БелТА.
У Лукашэнкі спыталі, ці магчыма дасягнуць міру ва Украіне пры цяперашнім прэзідэнце краіны ў кантэксце нядаўніх заяў Дональда Трампа.
«Хочаце атрымаць ад мяне адказ як ад палітыка ці па сутнасці? Калі па сутнасці — гэта маё крэда — гэта не пытанне Трампа», — сказаў ён.
«Хто будзе прэзідэнтам ва Украіне, вырашыць украінскі народ», — падкрэсліў Аляксандр Лукашэнка.
Ён адзначыў, што Уладзімір Зяленскі ў свой час абяцаў прабыць на пасадзе кіраўніка дзяржавы толькі адзін тэрмін.
«Трэба выконваць абяцанні, — звярнуў увагу Лукашэнка. — На выбары трэба ісці. У гэтым Трамп мае рацыю: абяцаў — трэба выконваць абяцанні. Але толькі не трэба дыктаваць. Трампу не варта дыктаваць, як паступіць Украіне».
Таксама ён падкрэсліў, што завяршэнне канфлікту неабходнае і ў гэтым зацікаўленыя як Украіна, так і Расія, паколькі вайна прыводзіць да негатыўных наступстваў для абедзвюх краін.
«І гэты мір будзе. Калі не сёлета, то ў наступным годзе. Я абсалютна ў гэтым перакананы», — заявіў Аляксандр Лукашэнка.
Каментары