Бізнэсмен Варабей запэўніў, што Лукашэнка перадае яму зямлю не задарма
Беларускі бізнэсмен Мікалай Варабей, якому Лукашэнка 15 кастрычніка прапанаваў перадаць землі ў Верхнядзвінскім раёне, заявіў, што гэта нібыта робіцца не за проста так, піша БелТА.
Як сцвярджае Варабей, калі дзяржава выдзяляе для бізнэс-праектаў зямлю або іншыя аб’екты, гаворка не павінна ісці пра іх бясплатную перадачу. Ён запэўніў, што гатовы аплаціць усё, што будзе належаць дзяржаве за сельскагаспадарчыя ўгоддзі і прадпрыемствы.
«Я не хацеў бы нешта браць у дзяржавы. Як бізнэсмен лічу, што дзяржаве трэба даваць. І кожны бізнэсмен павінен быць карысным дзяржаве і грамадству. Тады гэта правільны і добры бізнэсмен», — заявіў ён.
Варабей расказаў, што ўжо працяглы час працуе ў Верхнядзвінскім раёне. Спачатку асноўную ўвагу ён надаваў развіццю паляўнічай гаспадаркі. Па яго словах, там удалося стварыць прывабныя ўмовы для палявання і рыбалкі. Цяпер жа ён мае намер і далей развіваць рэгіён.
Сярод новых напрамкаў — сельскагаспадарчы праект «Чырвоны Бор Агра», які спецыялізуецца на развядзенні буйной рагатай жывёлы мясных парод. 15 кастрычніка гэты комплекс наведаў Аляксандр Лукашэнка. Падчас візіту абмяркоўвалі пашырэнне вытворчасці і выдзяленне дадатковых зямель.
Варабей паведаміў, што будаўніцтва аднаго малочнатаварнага комплексу ўжо пачалося, а ўзвядзенне другога плануецца распачаць вясной. Надалей бізнэсмен мае намер развіваць племянную жывёлагадоўлю і працягваць інвеставаць у рэгіён.
Ён таксама заявіў пра гатоўнасць укладваць сродкі не толькі ў вытворчасць, але і ў сацыяльную інфраструктуру. Паводле яго, развіццё прадпрыемстваў павінна ствараць працоўныя месцы, забяспечваць заробкі і паляпшаць умовы жыцця мясцовых жыхароў. У раёне, маўляў, ужо пабудавалі дарогі і месцы для адпачынку, а ў вёсках працуюць кавярні.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім7
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі1010
Каментары