У беларускі ў Італіі забралі двух сыноў — бо яна не прызнавала дзяржаву і не адпускала дзяцей у школу і да доктара
Іх «сям'ю ў лесе» ў Італіі называюць сектай.
16 кастрычніка 2025 года ў мястэчку Капрэзэ-Мікеланджэла ў правінцыі Арэца (Тасканія) карабінеры і сацыяльныя службы забралі двух хлопчыкаў, 8 і 4 гадоў, у беларускі Надзеі і яе мужа Гаральда Леа Валянціна. Пра гэта піша тасканская газета La Nazione.
Цяпер дзецям 9 і 5 гадоў. Бацькі сцвярджаюць, што за год так і не атрымалі ніякай інфармацыі пра іх.
«Мы дагэтуль нічога не ведаем. Ніякіх звестак пра тое, дзе яны і як, што ядуць, чым займаюцца, ці яны разам, ці іх раздзялілі», — кажа Надзея.
Падставай для таго, каб забраць дзяцей, стаў лад жыцця сям'і. Бацькі належаць да аб'яднання «Noi è, io sono» («Мы ёсць, я ёсць»), якое не прызнае ўладу дзяржавы. Таму дзеці не хадзілі ў школу і не наведвалі педыятра. Малодшы, паводле звестак, не быў прышчэплены. Газета адзначае, што ў хлопчыкаў было вельмі мала магчымасцяў мець зносіны з равеснікамі і дарослымі па-за аб'яднаннем. Многія называюць яго «сектай». На сваім сайце аб'яднанне апісвае сябе як «сукупнасць жывых і самавызначаных мужчын і жанчын, якія свабодна, у скаардынаваным супрацоўніцтве падзяляюць агульныя мэты».
За гэты год Гаральд Леа Валянцін паспрабаваў манетызаваць гісторыю сям'і. Ён напісаў і выдаў кнігу «Вялікі падман. Неверагодная гісторыя за кошт слабых — дваіх дзяцей 4 і 8 гадоў».
«Чаму нам па-ранейшаму нічога не паведамляюць пра лёс нашых дзяцей? Можа, мы павінны заплаціць выкуп, каб вярнуць іх?» — кажа ён. Ён расказаў, што нават папрасіў улады даслаць яму ліст з сумай выкупу, адрасаваны яму як «юрыдычна жывому чалавеку».
Цяпер чытаюць
У беларускі ў Італіі забралі двух сыноў — бо яна не прызнавала дзяржаву і не адпускала дзяцей у школу і да доктара8
Каментары