У Польшчы збіраюцца павялічыць суму, якую замежнікі павінны мець для ўезду
Мінімальную суму на дзень знаходжання прапануюць павялічыць у 4 разы. Каго змены закрануць?
Новыя патрабаванні прадугледжаныя праектам пастановы Міністэрства ўнутраных спраў і адміністрацыі Польшчы, піша MOST. Дакумент пакуль праходзіць кансультацыі.
Цяпер замежнікі, якія прыязджаюць у Польшчу на тэрмін да чатырох дзён, павінны мець прынамсі 300 злотых (69 еўра) або эквівалент у іншай валюце. Для даўжэйшага знаходжання патрабуецца не менш за 75 злотых (17 еўра) на дзень.
Праект прапануе павялічыць гэтыя сумы:
для паездкі працягласцю да чатырох дзён — да 1000 злотых (229 еўра);
для даўжэйшай паездкі — да 300 злотых (69 еўра) на кожны дзень.
Калі выдаткі на знаходжанне аплачвае прымаючы бок або чалавек прыязджае на турыстычнае мерапрыемства ці спартыўнае спаборніцтва, яму трэба будзе мець прынамсі 130 злотых (30 еўра) на дзень, але не менш за 650 злотых (149 еўра) агулам.
Для тых, хто ўязджае на вучобу або для навуковых даследаванняў, прапанаваны мінімум — 2020 злотых (463 еўра). Замест пацвярджэння наяўнасці грошай можна будзе прад’явіць дакумент аб прызначэнні стыпендыі.
Замежніку, які ўязджае з суседняй з Польшчай дзяржавы, трэба будзе мець яшчэ прынамсі 200 злотых (46 еўра) на зваротны білет або загадзя набыты білет.
Пацвердзіць наяўнасць сродкаў можна будзе дарожным чэкам, банкаўскай даведкай пра ліміт крэдытнай карты або пра грошы на рахунку ў банку Польшчы ці іншай краіны Еўрасаюза.
Змены не закрануць тых, хто ўязджае па дазволе на жыхарства, рабочай візе або візе, выдадзенай уладальніку карты паляка.
Паводле праекта, пастанова набудзе моц праз 30 дзён пасля падпісання міністрам.
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»48
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары