Зяленскі: Праца Starlink па-ранейшаму абмежаваная — толькі ва Украіне, але не ў ЕС
Зараз максімальная хуткасць, пры якой Starlink працягвае працаваць, складае 161 км/г.
Уладзімір Зяленскі заявіў, што тэрміналы спадарожнікавага інтэрнэту Starlink па-ранейшаму працуюць ва Украіне з абмежаваннямі, і гэта перашкаджае дзеянням украінскіх вайскоўцаў, піша Бі-бі-сі.
У суботу Зяленскі, адказваючы на пытанні журналістаў, сказаў, што зараз максімальная хуткасць, пры якой Starlink працягвае працаваць, складае 161 км/г.
«Пасля гэтага — паводле дакладаў, якія я бачыў і чуў, — Starlink цалкам адключаецца, і мы страчваем дрон», — сказаў Зяленскі.
Ён дадаў, што праз такія абмежаванні ўкраінскія вайскоўцы страцілі магчымасць перадаваць байцам на пазіцыях ежу і ваду.
«Гэта вельмі важна [у тых месцах], куды не можа прайсці вайсковец або тэхніка. Там, дзе ўзнікае ізаляцыя праз кантроль з боку варожых дронаў», — сказаў Зяленскі.
Паводле яго слоў, улады Украіны паспрабавалі праверыць, ці ўведзены такія ж абмежаванні для Starlink у ЕС.
«Мы адправілі некалькі машын з тэрміналамі Starlink на тэрыторыю краін Еўрапейскага саюза — і яны ехалі з хуткасцю (там, дзе гэта дазволена) больш за 180 км/г, а Starlink працаваў», — сказаў Зяленскі.
«Выснова наступная: абмежаванні дзейнічаюць на тэрыторыі Украіны і не дзейнічаюць на тэрыторыі краін ЕС. Гэта значыць, што гэта спланаваная аперацыя», — заявіў ён.
Раней Белы дом і ўладальнік SpaceX адмаўлялі, што прымалі рашэнне аб запаволенні працы Starlink. Аднак, паводле звестак брытанскай прэсы, гэтае рашэнне Маск мог прыняць супольна з прэзідэнтам ЗША Дональдам Трампам.
Цяпер чытаюць
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых1818
Каментары