«Tolki ciemru baču». Palitviazień Vacłaŭ Areška amal straciŭ zrok u źniavoleńni
Jon adbyvaje vosiem hadoŭ źniavoleńnia.
Aktyvist niezaležnaha prafsajuza REP Vacłaŭ Areška, jakoha ŭžo amal čatyry hady trymajuć u źniavoleńni, amal straciŭ zrok, paviedamiła Radyjo Svaboda infarmavanaja krynica.
«Kaža, što zrok amal źnik, užo tolki ciemru bačyć. Nastroj, kaniešnie, nie vielmi. Akramia zroku ahulny stan zdaroŭja taksama pahoršyŭsia», — raspaviała pra palitviaźnia krynica.
Vacłava Arešku zatrymali ŭ krasaviku 2022 hoda, praz hod prysudzili da 8 hadoŭ źniavoleńnia. Užo treci hod palitviaźnia trymajuć u Ivacevickaj kałonii № 22.
Praź piensijny ŭzrost palitviaźnia nie prymušajuć pracavać, ale jaho fizičny stan taki, što davodzicca zvodzić da minimumu pieramiaščeńni.
Pravaabaroncy ŭklučyli Vacłava Arešku ŭ śpis palitviaźniaŭ, jakija znachodziacca ŭ stanie asablivaj ryzyki pavodle zdaroŭja i patrabujuć jak maha chutčejšaha vyzvaleńnia.
«Zimoj, było, ź im razmaŭlali ŭžo z takimi namiokami, što chutka vypuściać, ale ničoha nie zdaryłasia», — raspaviała krynica pra Vacłava Arešku.
Pra situacyju z Vacłavam Areškam taksama raskazvali byłyja palitviaźni, jakim letaś pašancavała vyjści na volu.
Tak, u vieraśni na pres-kanfierencyi ŭ Vilni pra Arešku raskazaŭ były palitviazień Alaksandr Mancevič, jaki taksama adbyvaŭ svoj termin u kałonii № 22. Pavodle Manceviča, Areška ŭžo na toj momant amal ničoha nie bačyŭ, choć raniej čytaŭ knihi.
«Jamu dapamahajuć inšyja viaźni. Idučy pad ruku ŭ stałoŭku, Vacłaŭ pytaje, ci jość na niebie sonca. Kali chodzić unačy ŭ prybiralniu, byvaje, što spatykajecca i padaje, bo drenna bačyć», — raskazvaŭ Alaksandr Mancevič pra Arešku.
U studzieni 2026 hoda Vacłavu Arešku spoŭniłasia 70 hadoŭ. Pavodle infarmacyi pravaabaroncaŭ «Viasny», u kałonii Vacłaŭ Areška sprabavaŭ aformić invalidnaść, ale pakul heta zrabić nie ŭdałosia.
Palitołah i hramadski dziejač, aktyvist prafsajuza REP Vacłaŭ Areška ŭ pačatku 2023 hoda byŭ asudžany pavodle piaci artykułaŭ Kryminalnaha kodeksa, uklučajučy «stvareńnie ekstremisckaha farmiravańnia i ŭdzieł u im», i atrymaŭ 8 hadoŭ źniavoleńnia.
-
Jak prachodziać palavyja zbory ŭ školnikaŭ — šturmavać akopy i raźbirać aŭtamaty vučać i dziaŭčat
-
Łukašenka zaklikaŭ Armieniju być akuratnaj. «Kab nie paŭtaryć toje, što adbyłosia va Ukrainie»
-
Stała viadoma pra vyzvaleńnie Alaksandra Aranoviča — kiroŭcy aŭtadoma «Krainy dla žyćcia», jakoha aryštavali razam ź Cichanoŭskim
Ciapier čytajuć
Łukašenka niervova prakamientavaŭ vizit Cichanoŭskaj u Kijeŭ35
Kamientary