Były palitźniavoleny žurnalist Andrej Pačobut padpisaŭ zajavu na arendu kvatery z žyllovaha fondu Kamunalnaha tavarystva sacyjalnaha budaŭnictva (KTBS) u Biełastoku. Ciapier zajava budzie razhledžanaja Žyllovaj kamisijaj, paśla čaho projdzie standartnuju praceduru, paviedamlaje DzikMedia.
«Dziakuju prezidentu Biełastoka Tadevušu Truskalaskamu za zaprašeńnie ŭ Biełastok. Adsiul mnie budzie značna lahčej praciahvać pracu dziela demakratyi ŭ Biełarusi, a taksama na karyść Biełastoku i biełaruskaj mienšaści, jakaja žyvie tut», — skazaŭ Andrej Pačobut.
Šlach Andreja Pačobuta da atrymańnia žylla ŭ Biełastoku budzie karaciejšy za standartny dziakujučy jaho vyklučnym zasłuham pierad horadam. Takuju mahčymaść praduhledžvaje ŭstanoŭčy akt kampanii KTBS.
«Spadziajusia, što ŭžo ŭ druhoj pałovie žniŭnia Andrej Pačobut budzie žyć u Biełastoku, jaki stanie druhim domam dla hetaha vybitnaha čałavieka. Rady i tamu, što naš horad atrymaje takoha vydatnaha hramadzianina», — zajaviŭ prezident Biełastoka Tadevuš Truskalaski.
Sam Andrej Pačobut, adnak, u prynahodnaj razmovie z žurnalistami skazaŭ, što sam jon u vieraśni źbirajecca pajechać žyć u rodny Hrodna, a ŭ Biełastok budzie tolki pryjazdžać. Kvateraj ža ŭ hetym horadzie na pastajannaj asnovie buduć karystacca jaho dzieci.
«Kali budu ich (dziaciej) naviedvać, budu ŭ siabie», — adznačyŭ Pačobut.
Jon dadaŭ, što jaho dačka ŭžo čatyry hady žyvie ŭ Biełastoku, a syn u budučyni płanuje tut vučycca.
Andrej Pačobut — žurnalist Gazeta Wyborcza i adzin ź lidaraŭ polskaj mienšaści ŭ Biełarusi. Jaho zatrymali ŭ Hrodnie ŭ sakaviku 2021 hoda, a ŭ lutym 2023‑ha asudzili na vosiem hadoŭ kałonii pavodle abvinavačańniaŭ u «raspalvańni varožaści» i «zaklikach da dziejańniaŭ, nakiravanych na naniasieńnie škody nacyjanalnaj biaśpiecy». Padstavaj dla pieraśledu, siarod inšaha, stali jaho publikacyi i pohlady na histaryčnyja padziei. Pravaabaroncy pryznali Pačobuta palitviaźniem.
28 krasavika 2026 hoda jaho vyzvalili paśla bolš jak piaci hadoŭ niavoli ŭ miežach abmienu pamiž Biełaruśsiu i Polščaj i pieradali polskamu boku. Sam Pačobut nastojvaje, što jaho dom zastajecca ŭ Hrodnie.
Ciapier čytajuć
U siamji Mironcavych za palityku ŭžo asudzili maci i troch siaścior. A ciapier aryštavali i muža adnoj ź siaścior3
Kamientary
Dosyć achviaraú .