Na japonskim vostravie Kiusiu 28 lipienia adbyŭsia mocny ziemlatrus, jaki surjozna zakranuŭ prefiekturu Kumamota. Padziemnyja šturški adbylisia ŭ 16:27 pa miascovym časie. Paśla ich ułady arhanizavali evakuacyju bolš jak 150 tysiač žycharoŭ u biaśpiečnyja punkty. Papiaredžańnie pra mahčymaść cunami było abvieščana adrazu paśla ziemlatrusu, adnak prykładna praz hadzinu jaho skasavali, paviedamlaje Bi-bi-si.
Pavodle japonskich ŚMI, u vyniku ŭździejańnia stychii jość zahinułyja. Asabliva ciažkaja situacyja skłałasia ŭ handlovym centry Aeon Mall, dzie paśla ziemlatrusu abrynuŭsia druhi pavierch. Častka ludziej apynułasia pad zavałami. Telekanał Fuji TV paviedamiŭ pra paćvierdžanyja śmiarotnyja vypadki, a palicyja, pa źviestkach telekanała TBS, ličyć, što kolkaść zahinułych moža być značnaj.
Premjer-ministarka Japonii Sanae Takaici zajaviła, što sapraŭdny maštab razbureńniaŭ i čałaviečych strat jašče ŭdakładniajecca. Pavodle jaje słoŭ, užo viadoma pra paciarpiełych, šmatlikija adklučeńni elektraenierhii, pažary, paškodžańni daroh, mastoŭ i budynkaŭ. Dla likvidacyi nastupstvaŭ stychii pa prośbie kiraŭnictva prefiektury ŭ rajon biedstva nakiravali kala 3,6 tysiačy vajskoŭcaŭ Sił samaabarony. Jany razam ź miascovymi słužbami buduć pracavać kruhłasutačna, kab vyratavać ludziej i acanić maštab škody.
Pavodle źviestak dziaržaŭnaj telekampanii NHK, u adnoj z balnic užo pryniali bolš za 50 paciarpiełych. Hazieta Nikkei paviedamlaje, što traŭmy atrymali taksama pasažyry chutkasnaha ciahnika, jaki znachodziŭsia ŭ ruchu padčas ziemlatrusu.
Stychija naniesła surjoznyja paškodžańni transpartnaj infrastruktury. Na aŭtamabilnych darohach źjavilisia vialikija raskoliny, adzin hruzavy ciahnik syšoŭ z rejek, a na stancyi Jacusira, pavodle ahienctva Kyodo, pierakuliŭsia jašče adzin ciahnik. Na aerafotazdymkach taksama bačna abrušeńnie adnaho z mastoŭ.
Ź mierkavańniaŭ biaśpieki na Kiusiu spynieny ruch chutkasnych ciahnikoŭ «Sinkansen» i miascovych čyhunačnych maršrutaŭ. Zakrytaja ŭźlotna-pasadačnaja pałasa aeraporta Asa-Kumamota, admianiajucca avijarejsy.
Bujnyja pramysłovyja kampanii taksama pryniali ekstrannyja miery. Vytvorca mikračypaŭ TSMC evakujavaŭ supracoŭnikaŭ svajho zavoda ŭ rehijonie. Anałahična zrabili kampanii Sony i Fujifilm, jakija časova vyvieli piersanał sa svaich pradpryjemstvaŭ.
U handlovym centry Aeon Mall paśla pieršych padziemnych šturškoŭ adbyŭsia vybuch. Pa infarmacyi pažarnikaŭ, niekalki čałaviek akazalisia zabłakavanymi ŭnutry budynka. Pradstaŭniki kampanii Aeon adznačyli, što naviedvalnikaŭ i supracoŭnikaŭ paśpieli evakujavać adrazu paśla pačatku ziemlatrusu, a pryčyna vybuchu pakul vyśviatlajecca.
Mižnarodnaje ahienctva pa atamnaj enierhii paviedamiła, što atamnaja elektrastancyja «Sendaj», raźmieščanaja prykładna za 100 kiłamietraŭ ad epicentra, nie atrymała paškodžańniaŭ i praciahvaje pracavać u štatnym režymie.
Mietearałahičnaje ahienctva Japonii papiaredziła pra vysokuju vierahodnaść mocnych paŭtornych padziemnych šturškoŭ, pakolki ačah ziemlatrusu znachodziŭsia na nievialikaj hłybini — kala 10 kiłamietraŭ. Na kadrach ź miesca zdareńnia vidać paškodžanyja darohi, masty i niekalki budynkaŭ, achoplenych pažarami.
Japonija ŭvachodzić u lik najbolš siejśmična aktyŭnych krain śvietu — štohod tam rehistrujecca kala paŭtary tysiačy ziemlatrusaŭ. Apošniaja bujnaja trahiedyja ŭ prefiektury Kumamota adbyłasia ŭ 2016 hodzie, kali sieryja mahutnych padziemnych šturškoŭ zabrała žyćci 278 čałaviek.
Ciapier čytajuć
U Homieli za palityku asudzili kiraŭnika abjadnańnia, jakoje šukaje pareštki achviaraŭ vajny i stalinskich represij, i jaho žonku-miedsiastru3
Kamientary