Va Urocłavie zatrymali dvuch napadnikaŭ, što žorstka źbili ŭkrainskuju paru. Što za jany
Stali viadomy niekatoryja padrabiaznaści pra padazravanych u rezanansnym napadzie na ŭkrainskuju paru va Urocłavie. Palicyja Urocłava paviedamiła pra zatrymańnie dvuch padazravanych va ŭzroście 27 i 45 hadoŭ.
Va Urocłavie hramadskaje abureńnie vyklikaŭ napad na dvuch hramadzian Ukrainy — Naściu i Maksima.
Pavodle Gazeta Wyborcza, dziaŭčyna Naścia zajšła ŭ kramu pa pakupki, pakul jaje chłopiec Maksim čakaŭ kala mašyny. U čarzie mužčyna ź bintam na nazie pasprabavaŭ prajści biez čarhi. Dziaŭčyna zrabiła jamu zaŭvahu. Mužčyna i jaho pryjaciel u čyrvonaj majcy pačali čaplacca da dziaŭčyny i spytali, ci jana z Ukrainy. Jana pačuła na svoj adras i adras svajho chłopca abrazy i zakliki «jechać na vajnu».
Kali Naścia viartałasia da mašyny, mužčyna ź bintam na nazie ŭžo ŭdaryŭ Maksima. Paśla hetaha mužčyna ŭ čyrvonaj majcy z usioj siły ŭdaryŭ Naściu kułakom u tvar.
Da źbićcia dałučyŭsia jašče adzin mužčyna ŭ žoŭtaj majcy, jaki siadzieŭ u spartyŭnym aŭto niepadaloku. Jon padbieh i pačaŭ nanosić udary Maksimu, u tym liku nahoj pa hałavie. Paśla hetaha mužčyna sieŭ u svaju mašynu i źjechaŭ.
U paniadziełak uviečary, 27 lipienia, polskaja palicyja pry padtrymcy antyterarystyčnaha padraździaleńnia zatrymała dvuch z troch padazravanych.
Jak piša Gazeta Wyborcza, adnym z napadnikaŭ (ź bintam na nazie) źjaŭlajecca Adam S., pa mianušcy Cicu — raniej sudzimy mužčyna. Jon adbyŭ 10‑hadovy termin źniavoleńnia — za što, nie paviedamlajecca. Jon zajmajecca boksam i vystupaje ŭ kułačnych bajach.
Mužčyna ŭ žoŭtaj majcy zajmajecca MMA. Mienavita jon źjechaŭ ź miesca zdareńnia na spartyŭnym aŭto, ale byŭ zatrymany palicyjaj.
Palicyja praciahvaje rasśledavańnie spravy, šukaje ŭsich datyčnych da napadu na hlebie nacyjanalnaj nianaviści.
Kamientary
[Zredahavana]