Kaleśnikava: Kali ludzi nie mohuć pajechać u Jeŭropu, jany jeduć u Rasiju

Siońnia Maryja Kaleśnikava vystupaje z pramovaj na adkryćci Zalcburhskaha fiestyvalu — adnaho z najbujniejšych muzyčnych forumaŭ Jeŭropy. Napiaredadni jana dała intervju aŭstryjskaj haziecie Der Standard, u jakim raskazała, jak mastactva ratavała jaje ŭ izalacyi, i zaklikała Jeŭropu vypracavać stratehiju adnosna Biełarusi.

Kaleśnikava vyjšła na volu ŭ śniežni 2025 hoda razam z bolš jak 100 inšymi palitviaźniami — pad ciskam administracyi Donalda Trampa, jaki paśla źniaŭ častku sankcyj ź Biełarusi. Za kratami jana praviała piać hadoŭ i čatyry miesiacy.

Prafiesijnaja flejtystka raskazała, što ŭ kamiery jaje ratavała muzyka: jana hadzinami «słuchała» jaje ŭ hałavie, i heta vynosiła jaje za turemnyja ścieny. «Majo cieła było abmiežavanaje, ale sama ja, pa sutnaści, nikoli tam nie była», — kaža Kaleśnikava. Za čas źniavoleńnia jana pračytała bolš za 700 knih, niekatoryja pa dva-try razy: «Kali baviš čas z Manteniem, Šekśpiram ci Hiote, ty nikoli nie samotny».

Na pytańnie, ci nie biessensoŭny supraciŭ, kali masavyja pratesty nie zmahli zrynuć dyktaturu, Kaleśnikava adkazała, što supraciŭ mianiaje ludziej. U 2020 hodzie biełarusy ŭbačyli adno adnaho i zrazumieli, što jany nie adny, i hetaha adčuvańnia hodnaści i svabody, pavodle jaje, užo nie pazbavić.

«U dyktatury nie zasynaješ, kab pračnucca ŭ demakratyi. Svaboda i demakratyja — heta štodzionnaja praca», — dadała jana.

Značnaja častka razmovy pryśviečana razvažańniam pra toje, što rabić Jeŭropie.

Kaleśnikava ličyć, što brutalnaść režymu nie aznačaje jahonaj siły i što ciapier samy čas dla jeŭrapiejskaj dypłamatyčnaj stratehii: «Rasija rychtuje svaje scenaryi na čas paśla Łukašenki — i Jeŭropa musić rabić toje samaje».

Jana vystupaje za «čysta prahmatyčnuju kamunikacyju ź jasnymi metami» z režymam — bieź jahonaha pryznańnia. Prykładami jana nazyvaje pieramovy amierykancaŭ i razmovu Emanuela Makrona z Łukašenkam: «Kali nie razmaŭlaješ — nie maješ mahčymaści». Mahčymaści dla pieramoŭ, na jaje dumku, maje i niejtralnaja Aŭstryja.

Pry hetym hałoŭnym surazmoŭcam Jeŭropy musić być nie Łukašenka, a biełaruskaje hramadstva: «U doŭhaterminovaj pierśpiektyvie jano važniejšaje za Łukašenku. Viečnych dyktataraŭ nie byvaje».

Kaleśnikava nahadała, što ŭžo amal šeść hadoŭ biełarusy faktyčna adrezanyja ad Jeŭropy:

«Kali ludzi nie mohuć pajechać u Jeŭropu, jany jeduć u Rasiju. Jany vučacca ŭ Rasii, a nie ŭ Jeŭropie. Rasija pravodzić jasnuju i doŭhaterminovuju stratehiju, asabliva ŭ dačynieńni da moładzi i studentaŭ».

Tamu Jeŭropa, zastajučysia paśladoŭnaj u dačynieńni da režymu, pavinna trymać dźviery adčynienymi dla ludziej.

«Heta nie padarunak, a inviestycyja ŭ jeŭrapiejskuju budučyniu Biełarusi», — padkreśliła Kaleśnikava.

• 32
• 2
• 0
• 12
• 0
• 0
• 4
• 0