Na mohiłkach u Minsku źnieśli staryja kryžy i aharodžy. Zamiest ich staviać biezabličnyja bietonnyja padhałoŭniki
Łošyckija mohiłki stali čarhovym abjektam kamunalnaha dobraŭparadkavańnia ŭ stalicy. Tam demantujuć i ŭtylizujuć pomniki i kavanyja kryžy siaredziny minułaha stahodździa, ustaloŭvajučy na ich miescy standartnyja bietonnyja padhałoŭniki, jakija nie zachoŭvajuć ni fotazdymkaŭ, ni relihijnaj prynaležnaści pamierłych.
Jak paviedamlaje telehram-kanał «Spadčyna», čarhovaj achviaraj tak zvanaha dobraŭparadkavańnia stali staryja Łošyckija mohiłki, raźmieščanyja ŭ žyłym rajonie Čyžoŭka.
Hety niekropal byŭ zasnavany ŭ 1821 hodzie i da apošniaha času zastavaŭsia adnym ź niešmatlikich zachavanych uzoraŭ viaskovych pachavańniaŭ u miežach Minska. Za minułaje stahodździe tam sfarmiravaŭsia płast pachavalnaj kultury z aryhinalnymi kavanymi kryžami i samatužnymi pomnikami 1930— 1950‑ch hadoŭ. Siońnia hetyja abjekty masava demantujucca.
Naŭzamien zrezanych aharodžaŭ i śpiłavanych kryžoŭ, jakija ŭtylizujucca jak budaŭničaje śmiećcie, na miescy pachavańniaŭ staviać standartnyja šeryja plity.
Jak zaŭvažajuć aktyvisty, pry takoj zamienie całkam hublajecca indyvidualnaść pachavańnia i relihijnaja prynaležnaść pamierłych, pakolki tradycyjnyja chryścijanskija simvały zamianiajucca na śvieckija tablički.
Razam sa starymi pomnikami biezzvarotna źnikajuć i fotamiedaljony — časam adzinyja fotazdymki asob, jakija pachavanyja na mohiłkach. Akramia taho, pry miechaničnym pieranosie tekstavaj infarmacyi na novyja bietonnyja plity niaredka dapuskajucca faktyčnyja pamyłki ŭ imionach i datach žyćcia.
Masavy znos starych nadmahillaŭ i aharodžaŭ tłumačycca vyklučna prahmatyčnymi metami. Ščylnaja chaatyčnaja zabudova starych mohiłak uskładniaje ich absłuhoŭvańnie. Znos ciesna rasstaŭlenych aharodžaŭ dazvalaje kamunalnym słužbam bieśpieraškodna vykarystoŭvać trymiery i hazonakasiłki.
Pry hetym demantaž pravodzicca biez nahladu z boku historykaŭ i niekrapalistaŭ. Taki padychod viadzie da fizičnaj straty materyjalnych abjektaŭ, jakija źjaŭlajucca histaryčnymi śviedkami minułych epoch.
Praktyka padobnaha dobraŭparadkavańnia nabyła ŭ Minsku sistemny charaktar. Pa anałahičnaj schiemie z poŭnaj zamienaj aryhinalnych pomnikaŭ na ŭnifikavanyja plity raniej byli pieraroblenyja Krupieckija i Vajskovyja mohiłki. Ciapier taki farmat rabot raspaŭsiudziŭsia na Kozyraŭski i Łošycki niekropali.
Nastupnym abjektam, dzie moža być realizavany padobny scenar abiaźličvańnia, nazyvajuć Kalvaryjskija mohiłki.
Kamientary