Dvoje biełarusaŭ, jakija mieli suviazi z rasijskaj vajskovaj pramysłovaściu, pryznali svaju vinu ŭ Litvie
Kampanija, jakuju kantralavali biełarusy, dałučyłasia da prajekta Ahienctva kaśmičnaj prahramy Jeŭrasajuza, piša LRT sa spasyłkaj na Słužbu rasśledavańniaŭ finansavych złačynstvaŭ Litvy. Heta spravakavała ŭvahu da ich i rasśledavańnie.
Vilenski akruhovy sud pryznaŭ dvuch hramadzian Biełarusi vinavatymi ŭ machlarstvie ź jeŭrapiejskim finansavańniem. Praz kampaniju ŭ Litvie jany atrymali 447 tysiač jeŭra na raspracoŭku vysokadakładnaj spadarožnikavaj navihacyi, ale schavali svaje suviazi z padsankcyjnaj rasijskaj kampanijaj, jakaja stvarała i vypraboŭvała navihacyjnyja čypy dla vajskovych patreb.
Kampanija, jakuju kantralavali biełarusy, dałučyłasia da prajekta Ahienctva kaśmičnaj prahramy Jeŭrasajuza (EUSPA). Jaho metaj była raspracoŭka pryjomnikaŭ, jakija vykarystoŭvajuć vysokadakładny sihnał jeŭrapiejskaj spadarožnikavaj sistemy Galileo.
Takija pryłady płanavałasia vykarystoŭvać u sielskaj haspadarcy — naprykład, dla dakładnaha kiravańnia traktarami i inšaj technikaj. Ahulny biudžet prajekta pieravyšaŭ miljon jeŭra. EUSPA pahadziłasia prafinansavać bolš za 745 tysiač jeŭra, ź jakich litoŭskaja kampanija paśpieła atrymać 447 272 jeŭra.
Kab atrymać hrošy, kampanija zadekłaravała, što nie źviazanaja ź ludźmi i arhanizacyjami pad sankcyjami i što na jaje nie raspaŭsiudžvajucca abmiežavańni Jeŭrasajuza.
Adnak śledstva vyśvietliła, što faktyčnymi kantralorami pradpryjemstva zastavalisia dvoje biełarusaŭ. Paśla pačatku poŭnamaštabnaha rasijskaha ŭvarvańnia va Ukrainu farmalnym kiraŭnikom kampanii zrabili ich svajaka, jaki maje hramadzianstva ZŠA i Litvy. Pavodle śledstva, tak jany sprabavali abyści abmiežavańni ES, uviedzienyja dla hramadzian Biełarusi.
Vyśvietliłasia taksama, što abodva zajmali kiroŭnyja pasady ŭ rasijskaj kampanii, jakaja trapiła pad sankcyi Jeŭrasajuza. Jana zajmałasia raspracoŭkaj i vyprabavańniami čypaŭ spadarožnikavaj navihacyi dla vajskovaha vykarystańnia. Adzin z asudžanych u 2020—2021 hadach atrymaŭ taksama rasijskaje hramadzianstva.
Takim čynam, sprava tyčyłasia nie tolki niezakonnaha atrymańnia jeŭrapiejskich hrošaj. Padaŭšy iłžyvyja źviestki, źviazanyja z rasijskaj vajskovaj pramysłovaściu asoby atrymali dostup da finansavańnia, rynku ES i prastoravych hieaźviestak. Pry hetym śledstva nie śćviardžaje, što raspracoŭki abo źviestki byli pieradadzienyja Rasii.
Abodva biełarusy pryznali vinu i całkam kampiensavali naniesienuju škodu — 447 272 jeŭra. Jakoje mienavita pakarańnie im pryznačyŭ sud, u paviedamleńni nie ŭdakładniajecca.
Ciapier čytajuć
Adciskańni z tatam, uroki z mamaj. Jak žyvie i vučycca siamja Sieviaryncaŭ u Vilni4
Kamientary