U Minsku źbirajucca ŭ čatyry razy pavialičyć psichbalnicu na Biechcierava

Zhodna z pradstaŭlenaj architekturna-płanirovačnaj kancepcyjaj, isny korpus pa vulicy Biechcierava, 5, pabudavany ŭ 1971 hodzie, budzie rekanstrujavany. Ale hałoŭnyja źmieny adbuducca pobač: na terytoryi centra, jakaja zajmaje bolš za try hiektary, płanujuć uźvieści dva zusim novyja budynki.

Samym maštabnym abjektam budučaj budoŭli stanie stacyjanarny korpus, ahulnaja płošča jakoha składzie kala 13 000 kvadratnych mietraŭ. Pobač ź im paŭstanie mienšy pa pamierach ambułatorny korpus płoščaj kala 4 800 kvadratnych mietraŭ.

U vyniku realizacyi hetych płanaŭ ahulnaja płošča miedycynskaj ustanovy vyraście prykładna ŭ čatyry razy, bo ciapier jana składaje tolki kala 5,5 tysiačy kvadrataŭ.

Pavialičyć

Taksama prajektam praduhledžana pavieličeńnie kolkaści parkovačnych miescaŭ na terytoryi da 64, pryčym dadatkovyja stajanki źjaviacca ŭzdoŭž vulicy Biechcierava. Pry hetym raspracoŭščyki abiacajuć maksimalna zachavać zialonyja nasadžeńni.

MRT, reanimacyja i asobnaje adździaleńnie dla pažyłych

Prajekciroŭščyki płanujuć raźmiaścić u stacyjanarnym błoku psichijatryčnyja adździaleńni, pryčym niekatoryja buduć śpiecyjalizavanymi: akramia dvuch ahulnych, zapłanavana asobnaje hierantałahičnaje adździaleńnie dla pažyłych ludziej i adździaleńnie pahraničnych stanaŭ. Heta dazvolić raźmiežavać pacyjentaŭ z roznymi dyjahnazami.

Pavialičyć

Miedycynskaja baza budzie istotna ŭzmocniena: prajekt uklučaje ŭłasnaje reanimacyjnaje adździaleńnie, centralizavanaje sterylizacyjnaje adździaleńnie, balničnuju apteku i navat adździaleńnie MRT, što značna palepšyć dyjahnostyku na miescy.

Ambułatorny korpus voźmie na siabie funkcyju palikliniki. Tut raźmieściacca kabiniety daktaroŭ-śpiecyjalistaŭ, administracyja centra, archiŭ, a taksama ŭsie słužby, źviazanyja z vydačaj dakumientaŭ: biuro rehistracyi listkoŭ niepracazdolnaści, pamiaškańni dla prafahladaŭ i ŭračebna-kansultacyjnaj kamisii.

Navošta heta treba

Nieabchodnaść takich hrandyjoznych pieraŭtvareńniaŭ tłumačać decentralizacyjaj słužby i drennymi ŭmovami dla pacyjentaŭ. Siońnia padraździaleńni centra raskidany pa horadzie: aproč asnoŭnaha korpusa na Biechcierava, Haradski centr pahraničnych stanaŭ tulicca na pieršym paviersie žyłoha doma na vulicy Miendzialejeva, a psichijatryčnaje adździaleńnie dzionnaha znachodžańnia №2 — u žyłym domie na vulicy Kamunistyčnaj.

U samim ža stacyjanary na Biechcierava situacyju nazyvajuć krytyčnaj. Pacyjenty lažać u pałatach pa dzieviać čałaviek, što, pa słovach miedykaŭ, nie spryjaje stvareńniu narmalnaha psichałahičnaha klimatu i parušaje sanitarnyja normy.

Akramia taho, ciesnata nie dazvalaje padzialić patoki ludziej: tych, chto pryjšoŭ na prafiłaktyčny ahlad pa daviedku, i tych, chto pakutuje ad realnych psichičnych razładaŭ. Budaŭnictva novych karpusoŭ pavinna vyrašyć hetyja prablemy i sabrać usie słužby ŭ adnym miescy.

Pavialičyć

Varta adznačyć, što zusim niadaŭna, u 2025 hodzie, prajektnaj arhanizacyjaj «Bradek» užo byŭ raspracavany budaŭničy prajekt madernizacyi budynkaŭ na Biechcierava, 5 i 5/1. Raboty byli vykanany ŭ tym ža hodzie, praŭda źniešnie ŭsio abmiežavałasia razmaloŭkaj fasadaŭ u depresiŭnuju hieamietryju karyčnieva-šerych koleraŭ. 

Novy prajekt praduhledžvaje bolš žyćcieśćviardžalny vyhlad: fasady novych karpusoŭ pradstaŭlenyja z bujnapamiernymi śvietłymi panelami, z łamielami pad dreva i voknami ŭ kantrasnych ciomnych ramach. Stary korpus na rendarach taksama pieramalavany ŭ śvietłyja kolery. 

Jak pryniać udzieł u abmierkavańni

Hramadskaje abmierkavańnie kancepcyi projdzie z 9 pa 23 sakavika 2026 hoda. Materyjały prajekta buduć vystaŭleny ŭ faje administracyi Zavodskaha rajona (vuł. Žyłunoviča, 17, słužba «adno akno») i raźmieščany na aficyjnym sajcie rajonnaj administracyi. Akramia taho, z 11 pa 23 sakavika na sajcie administracyi budzie dastupnaja videa-prezientacyja prajekta.

Svaje zaŭvahi i prapanovy haradžanie mohuć pakinuć u žurnale ŭ budynku administracyi abo dasłać na elektronnuju poštu [email protected] z abaviazkovaj paznakaj «hramadskaje abmierkavańnie». Zakazčykam ciapierašniaha prajekta vystupaje ŭsio toje ž kamunalnaje pradpryjemstva «Miedyk». Vyniki abmierkavańnia padviaduć na architekturna-horadabudaŭničym saviecie pry hałoŭnym architektary Minska.

• 6
• 0
• 1
• 2
• 4
• 0
• 1
• 0