U Breście prarab i dvoje kiroŭcaŭ skrali amal 200 ton budaŭničaj sumiesi
U Breście sud vynies prysud prarabu i dvum kiroŭcam, jakija skrali amal 200 ton asfaltahranulatu. Padrabiaznaści spravy paviedamili ŭ prakuratury Bresckaj vobłaści.
Śledčyja vyśvietlili, što ŭ kastryčniku 2025 hoda prarab adnoj z kamiercyjnych arhanizacyj rajona damoviŭsia z kiroŭcami budaŭničaj arhanizacyi pra sumiesny kradziež budaŭničaj sumiesi. Jany płanavali pradać asfaltahranulat znajomamu, jaki chacieŭ vykarystać jaho dla padsypki ŭčastka.
Prarab daručyŭ treciamu kiroŭcu zahruzić materyjał dla vyvazu. Pry hetym toj nie viedaŭ, što ŭdzielničaje ŭ kradziažy. Kab schavać złačynstva, prarab unios u dakumienty chłuślivyja źviestki i śpisaŭ asfaltahranulat jak materyjał, vykarystany padčas budaŭničych rabot.
Za dastaŭku sumiesi prarab i kiroŭcy atrymali kala 7000 rubloŭ, jakija padzialili pamiž saboj.
Sud pryznaŭ usich traich vinavatymi ŭ kradziažy, učynienym hrupaj asob šlacham złoŭžyvańnia słužbovymi paŭnamoctvami (častka 2 artykuła 210 Kryminalnaha kodeksa Biełarusi). Kožnaha asudzili da troch hadoŭ pazbaŭleńnia voli i štrafu ŭ pamiery 300 bazavych vieličyń — 13 500 rubloŭ pa stanie na vierasień 2026 hoda.
Byłomu prarabu taksama zabaranili na praciahu piaci hadoŭ zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ.
Usim fihurantam adkłali vykanańnie asnoŭnaha pakarańnia na dva hady ŭ adpaviednaści z častkaj 1 artykuła 77 Kryminalnaha kodeksa Biełarusi.
Kamientary