Tramp padčas telefonnaj razmovy ź Zialenskim nastojliva patrabavaŭ spynić udary pa rasijskich NPZ

Prezident ZŠA Donald Tramp padčas telefonnaj razmovy z ukrainskim lidaram Uładzimiram Zialenskim u niadzielu, 20 vieraśnia, nieadnarazova prasiŭ spynić udary pa rasijskich naftapierapracoŭčych zavodach (NPZ), paviedamlaje Moscow Times sa spasyłkaj na Axios.

«Słova «dyziel» šmat razoŭ zhadvałasia padčas razmovy», — skazaŭ surazmoŭca vydańnia, dadaŭšy, što ataki pryvodziać da rostu suśvietnych cen na dyzielnaje paliva.

Pavodle danych Amierykanskaj aŭtamabilnaj asacyjacyi (AAA), 20 vieraśnia cana na dyzielnaje paliva ŭ ZŠA abnaviła histaryčny maksimum i dasiahnuła $6,49 za hałon (3,79 ł). Za hod košt dyziela ŭ krainie vyras amal udvaja.

Raniej Tramp u razmovie z žurnalistami telekanała Fox zajaviŭ, što Zialenskamu treba spynić udary pa rasijskich naftapierapracoŭčych zavodach, pakolki jany ŭzmacniajuć «deficyt dyziela».

Kiraŭnik Biełaha doma adznačyŭ, što prablemy z pastaŭkami paliva źviazanyja nie z vajennymi dziejańniami ZŠA suprać Irana, a z rasijska-ŭkrainskaj vajnoj.

«Nie nanoście ŭdary pa dyzielnym palivie, tamu što heta škodzić, heta škodzić usiamu śvietu», — źviartaŭsia Tramp da Kijeva.

Paśla hetaha amierykanski prezident zajaviŭ, što Ukraina pahadziłasia nie nanosić udaraŭ pa rasijskich enierhietyčnych abjektach. Rasija, zapeŭnivaŭ Tramp, taksama nie budzie atakavać ukrainskuju enierhietyku. Adnak abmien udarami praciahnuŭsia.

Zialenski prapanavaŭ rasijskamu kiraŭnictvu «pakłaści na stoł» śpis abjektaŭ, pa jakich ukrainskaja armija nie pavinna budzie nanosić udary ŭ ramkach enierhietyčnaha pieramirja.

U Kramli nazvali admovu ad udaraŭ pa enierhietyčnaj infrastruktury «dobraj idejaj», adnak padkreślili, što zabieśpiačeńnie biaśpiečnaj pracy NPZ i pavieličeńnie abjomaŭ vytvorčaści naftapraduktaŭ nie dapamoža spravicca z deficytam.

«Asnoŭnaja prablema — z vyvadam naftapraduktaŭ na suśvietnyja rynki», — adznačyŭ pres-sakratar prezidenta RF Dźmitryj Piaskoŭ. Jon udakładniŭ, što havorka idzie pra ŭkrainskija ŭdary pa tankierach i mižnarodnyja sankcyi.

Z pačatku 2026 hoda Uzbrojenyja siły Ukrainy (USU) bolš za 70 razoŭ nanosili ŭdary pa rasijskich NPZ i vyvieli sa stroju niekalki dziasiatkaŭ ź ich.

Tolki ŭ žniŭni šeść bujnych zavodaŭ spyniali pracu dla ramontu.

Pavodle danych EA Analytics, z-za pierapynieńnia pracy NPZ naftapierapracoŭka ŭ Rasii źniziłasia da minimalnaha ŭzroŭniu z 2002 hoda. Heta, u svaju čarhu, pryviało da deficytu paliva ŭ krainie i zabarony na jaho ekspart.

• 0
• 1
• 12
• 7
• 0
• 0
• 7
• 0