«Štoranku tazik pamidoraŭ». Što za biełaruski sort «Zorka», jaki tak chvalać

«Kupiłasia na rekłamu i nabyła nasieńnie pamidoraŭ «Zorka». Biełaruskaja sielekcyja, byccam by nie chvarejuć, nie pasynkujucca, nie sochnuć — tak było abiacana. Dyk što skažu. Rodziać jany jak trusiki — ja ŭžo nie viedaju, u jakija słoiki mnie što składać z tych pamidoraŭ. Pakutuje i maja svajačka, ź jakoj ja padzialiłasia rasadaj — štoranku tazik pamidoraŭ! Pamidory vielmi smačnyja, sapraŭdnyja, nijakaj tam zialonaj dupki, adno tamatnaje miasa», — napisała adna z dačnic u siabie ŭ instahramie.

Za emacyjnym vodhukam staić całkam realny biełaruski sort — pryčym daloka nie novy. «Zorka» naležyć da rańniaśpiełych tamataŭ: ad źjaŭleńnia ŭschodaŭ da pačatku płodanašeńnia prachodzić kala 103‑105 dzion. Vyroščvać jaje možna jak u adkrytym hruncie, tak i pad ukryćciom.

Sort determinantny, što aznačaje, što rost kusta abmiežavany. Pavodle apisańnia, raślina kampaktnaja i dasiahaje vyšyni 50‑60 sm. Heta zručna dla nievialikich učastkaŭ i nievysokich parnikoŭ, dy i dahladać taki kust praściej, čym vysokarosłyja tamaty.

Nievialiki pamier kusta nie aznačaje nievialikaha ŭradžaju. «Zorka» zdolnaja ŭtvarać šmat płodnych hronak. Kolki kiłahramaŭ atrymajecca sabrać, naturalna, zaležyć ad nadvorja i dohladu.

Kampaktnaść kusta nie aznačaje, što pra jaho možna zusim zabycca. Determinantnyja tamaty taksama ŭtvarajuć bakavyja parastki, tamu ŭ zaležnaści ad sposabu vyroščvańnia «Zorcy» moža spatrebicca pasynkavańnie. A kali pładoŭ zaviažacca šmat — i padviazka, kab halinki nie kłalisia na ziamlu pad ich ciažaram.

Za što «Zorku» možna palubić

Sami pamidory ŭ «Zorki» kala 80‑100 hramaŭ, kruhlava-plaskatyja, u śpiełym vyhladzie nasyčana-čyrvonyja.

Jość u ich adna asablivaść, jakuju dobra zaŭvažyła i aŭtarka dopisu: u śpiełaha pamidora niama ćviordaj zielenavataj častki kala «chvościka», jakuju pry pierapracoŭcy davodzicca vyrazać.

Smak «Zorki» ŭ apisańniach sortu aceńvajecca na 4,8‑5 bałaŭ ź piaci. Płady miasistyja i sakavityja, z bałansam sałodkaści i kiślinki.

Pamier taksama davoli ŭniviersalny: heta nie pamidory-hihanty, jakija davodzicca rezać na niekalki častak, ale i nie drobnyja čery. Ich možna jeści śviežymi, puskać na sousy i sok, a taksama kansiervavać całkam. Tak što prablema, «u jakija słoiki składać», u vypadku dobraha ŭradžaju sapraŭdy moža stać aktualnaj.

Pavialičyć

A što ź fitaftoraj?

Voś tut da rekłamnych abiacańniaŭ varta stavicca bolš aściarožna.

«Zorku» sapraŭdy nazyvajuć adnosna ŭstojlivaj da fitaftarozu. Ale adna z pryčyn hetaha — jaje rańniaśpiełaść. Sort moža paśpieć sfarmavać značnuju častku ŭradžaju da taho času, kali ŭ druhoj pałovie leta stvarajucca asabliva spryjalnyja ŭmovy dla masavaha raźvićcia fitaftory.

Tamu cudaŭ ad jaje čakać usio ž nie varta. Paliŭ, charčavańnie, abarona ad chvarob i narmalnyja ŭmovy vyroščvańnia ŭpłyvajuć na «Zorku» hetaksama, jak i na inšyja tamaty.

Rasadu vysadžvajuć paśla taho, jak minaje niebiaśpieka zamarazkaŭ, na soniečnym miescy. Pamidory lubiać uradlivuju, dobra drenavanuju hlebu i nie lubiać zastoju vady. Palivać lepš pad korań, nie močačy liście.

Pry hetym kampaktny kust i rańniaje paśpiavańnie robiać «Zorku» davoli zručnym varyjantam dla tych, chto nie choča pieratvarać vyroščvańnie pamidoraŭ u asobnuju pracu na ŭsio leta.

Sam sort nie hibryd F1, a sort. Dla aharodnika heta aznačaje jašče adnu praktyčnuju reč: z paśpiełych pładoŭ možna narychtavać ułasnaje nasieńnie na nastupny siezon.

• 6
• 0
• 0
• 1
• 0
• 0
• 0
• 0