Majstra aŭtacentra «Reno» ź Minska pasadzili za dapamohu represavanym, a paśla zaviali jašče adnu spravu

Dźmitryj Rožyn naradziŭsia ŭ 1996 hodzie. Da svajho aryštu jon žyŭ u Minsku i pracavaŭ majstram kuzaŭnoha cecha ŭ aŭtamabilnaj kampanii «Łazanž» — heta aŭtacentr «Reno». 

Chłopca aryštavali 12 maja 2025 hoda. Pavodle infarmacyi pravaabaroncaŭ, pryčynaj stała dapamoha fondu, jaki padtrymlivaje represavanych biełarusaŭ.

U vyniku Minski haradski sud vynies jamu prysud pavodle č. 1 art. 14 i č. 2 art. 361‑4 Kryminalnaha kodeksa — zamach na «sadziejničańnie ekstremisckaj dziejnaści». Dźmitryja pakarali 3 hadami kałonii ahulnaha režymu sa štrafam. Adbyvać termin palitviaźnia adpravili ŭ babrujskuju kałoniju №2.

Viasnoj 2026 hoda stała viadoma, što na Rožyna zaviali novuju kryminalnuju spravu i viarnuli jaho ŭ minski SIZA №1.

U vieraśni vyśvietliłasia, što chłopca asudzili jašče raz, znoŭ pavodle artykuła za «sadziejničańnie ekstremisckaj dziejnaści» (užo pa č. 1 art. 361‑4 KK). Sumarny prysud nieviadomy.

Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ. 

«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy. 

Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».

«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

• 0
• 0
• 0
• 0
• 1
• 4
• 14
• 0