U Balivii apisali novy vid dzikaha kata. Takoha nie było bolš za 100 hadoŭ
U Balivii navukoŭcy vyjavili raniej nieviadomy vid dzikaha kata. Heta pieršy vypadak bolš čym za sto hadoŭ, kali novy vid žyvoj žyvioliny ź siamiejstva kacinych byŭ aficyjna apisany i atrymaŭ navukovuju nazvu, piša Reuters.
Žyviolina žyvie ŭ hornych lasach Junhas — vilhotnym rehijonie na ŭschodnich schiłach Andaŭ. Miascovyja žychary nazyvajuć jaje «ciłkaja». Navukoŭcy zachavali hetuju nazvu ŭ navukovym najmieńni — Leopardus tilcayo.
Kot maje śvietła-karyčnievuju poŭść ź niapravilnymi ciomnymi plamami, dasiahaje prykładna 46 santymietraŭ u daŭžyniu i važyć kala 1,4 kiłahrama. Jon mienšy za zvyčajnaha chatniaha kata. Pradstaŭniki novaha vidu naležać da hrupy tak zvanych tyhravych katoŭ, jakija raspaŭsiudžanyja ŭ roznych rehijonach Paŭdniovaj Amieryki.
Adkryćcio stała mahčymym paśla hienietyčnaha daśledavańnia 38 žyvioł ź niekalkich krain Paŭdniovaj Amieryki, u tym liku vaśmi muziejnych ekspanataŭ. Analiz DNK pakazaŭ, što tyhravyja katy, jakija raniej razhladalisia jak adzin vid, nasamreč uklučajuć piać hienietyčna adroznych vidaŭ. Linija ciłkai adździaliłasia ad inšych tyhravych katoŭ prykładna 1,4 miljona hoda tamu.
Cikavaść daśledčykaŭ vyklikała toje, što źniešnaść balivijskaj žyvioliny nie adpaviadała apisańniam, zasnavanym pieravažna na vyvučeńni katoŭ z Brazilii. Adnaho ź viadomych navukoŭcam samcoŭ, jakomu ciapier kala dziesiaci hadoŭ, miascovaja siamja niekatory čas trymała ŭ siabie doma, pamyłkova pryniaŭšy jaho za chatniaje kaciania. Ciapier jon žyvie ŭ prytułku dla dzikich žyvioł Senda Verde.
Pra ład žyćcia ciłkai pakul viadoma vielmi mała. Reštki drobnych hryzunoŭ u probach ekskremientaŭ śviedčać, što jany mohuć uvachodzić u racyjon žyvioły. Zapisy fotapastak pakazvajuć, što koška, vierahodna, bolš aktyŭnaja ŭnačy.
Daśledčyki taksama apisali novy padvid tyhravaha kata ŭ pieruanskaj častcy Junhas. Jamu dali nazvu Leopardus tigrinus antisuyo — u honar Antysujo, rehijona byłoj impieryi inkaŭ, dzie žyvie hetaja žyvioła.
Navukoŭcy pieradajuć vyniki daśledavańnia Mižnarodnamu sajuzu achovy pryrody, jaki płanuje asobna acanić piać hienietyčnych linij tyhravych katoŭ. Heta moža dazvolić bolš dakładna vyznačyć stupień pahrozy dla kožnaha vidu. Naprykład, ciłkaja paśla asobnaj acenki moža atrymać status vidu, jakomu pahražaje źniknieńnie.
Lasy Junhas ličacca adnoj z najbolš uraźlivych ekasistem rehijona. Im pahražajuć vysiečka lesu, pašyreńnie sielskaj haspadarki, pažary, vyklikanyja čałaviekam, i zdabyča karysnych vykapniaŭ. Navukoŭcy padkreślivajuć nieabchodnaść adnaŭlać paškodžanyja pažarami ŭčastki, zachoŭvać reštki naturalnych lasoŭ i padtrymlivać suviazi pamiž asobnymi miescami pražyvańnia žyvioł.
Daśledčyki adznačajuć, što adkryćcio novaha vidu navat siarod dobra vyvučanaj hrupy drapiežnikaŭ pakazvaje: u śviecie ŭsio jašče isnuje mnostva nieviadomych navucy žyvioł. Niekatoryja ź ich mohuć źniknuć jašče da taho, jak ludzi paśpiejuć ich vyjavić.
U Bierlinie zahadkava źnikajuć vierabji. Navukoŭcy nie viedajuć čamu
U Brytanii źnikłaha kata znajšli praz hod za 160 kiłamietraŭ ad doma ŭ prytułku dla biazdomnych žyvioł
Advažny kot kinuŭ śmieły vyklik lisie — vypadak u Hrodnie
Novaje daśledavańnie pakazała, što pahroza ad ździčełych katoŭ u Aŭstralii była mocna niedaacenienaja
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma12
Kamientary
Prosta voś "niezvyčajny kot" - tam 4 małych vidaŭ katoŭ žyvie, jakich časam robiać svojskimi.