КДБ запусціў новы бот у тэлеграме для вярбоўкі беларусаў за мяжой. Прапануюць расклейваць улёткі, фатаграфаваць аб'екты і «нешта іншае»
Спецслужбы рассылаюць прапановы аб падпрацоўцы праз тэлеграм-бот і абяцаюць заробак да 1400 еўра. Спачатку просяць расклеіць правакацыйныя ўлёткі, у якіх палякам у выпадку акупацыі раяць «не фатаграфаваць вайсковай тэхнікі і не перашкаджаць яе руху».
Прапановы з «простай падпрацоўкай» пачалі масава з'яўляцца ў чатах беларускай дыяспары ў Польшчы і Літве (напрыклад, у суполцы «Беларусы Вільні»), а таксама прыходзіць у асабістыя паведамленні тым, хто пакідаў каментары ў чатах.
У аб'явах шукаюць людзей са смартфонам, якім прапануюць рабіць фота патрэбных аб'ектаў. Аўтары асобна падкрэсліваюць, што праца «не звязаная з наркотыкамі ці закладкамі», і накіроўваюць за падрабязнасцямі ў бот.
Як вынікае з перапісак з аператарамі бота, якія трапілі ў распараджэнне «Нашай Нівы», насамрэч адразу фатаграфаваць аб'екты не просяць. Для праверкі на «адэкватнасць» выканаўцам у Варшаве, Познані ды іншых гарадах спачатку ставяць задачу раздрукаваць і расклеіць на скотч у людных месцах ад 10 да 100 улётак.
За адну паперку абяцаюць адзін еўра, грошы прапануюць перавесці на картку альбо сэрвіс Wise адразу пасля фотасправаздачы. Самі вярбоўшчыкі называюць гэта «сацыяльнай рэкламай» або «вывучэннем сацыяльных паводзін», а мінакам на вуліцы раяць казаць, што адбываюцца здымкі фільма ці сацыяльны эксперымент.
Насамрэч улёткі маюць правакацыйны змест: яны аформленыя з выкарыстаннем польскага герба на фоне сілуэта Варшавы і маюць загаловак «Правілы бяспечных паводзін у выпадку акупацыі» (Zasady bezpiecznego zachowania w przypadku okupacji).
У пяці пунктах жыхарам Польшчы раяць «не правакаваць», «не здымаць вайсковай тэхнікі і месцаў яе дыслакацыі», «не блакаваць дарог і не затрымліваць вайсковых калон», а таксама зрабіць запасы вады з ежай і заставацца дома.
Толькі пасля выканання гэтага тэставага задання куратары абяцаюць перайсці да больш сур'ёзных даручэнняў — фотаздымкі аб'ектаў і «іншай працы», за якую прапануюць ад 150 да 1400 еўра.
Такім чынам спецслужбы могуць не толькі ладзіць інфармацыйныя правакацыі ў краінах ЕС, але і збіраць асабістыя ды плацежныя даныя беларусаў за мяжой, каб пасля шантажаваць іх і прымушаць да шпіянажу ці дыверсій.
«Наша Нiва» — бастыён беларушчыны
ПАДТРЫМАЦЬЦяпер чытаюць
КДБ запусціў новы бот у тэлеграме для вярбоўкі беларусаў за мяжой. Прапануюць расклейваць улёткі, фатаграфаваць аб'екты і «нешта іншае»9
Каментары