Доўгі час ідэальным мужчынам у рамантычных адносінах лічыўся ўпэўнены ў сабе лідар, які заўсёды бярэ ініцыятыву і прымае галоўныя рашэнні. Новае апытанне паказала, што гэты вобраз паступова губляе прывабнасць. Дык якіх мужчын жанчыны хочуць бачыць побач з сабой?
Вобраз так званага альфа-самца добра знаёмы па фільмах, кнігах і сацыяльных сетках. Гэта моцны, рашучы і дамінантны мужчына, які ведае, чаго хоча, не баіцца канфліктаў і імкнецца кантраляваць сітуацыю. У рамантычных гісторыях менавіта такія героі нярэдка становяцца аб'ектамі жаночага захаплення.
У рэальным жыцці, аднак, адносіны не заўсёды будуюцца паводле такога сцэнарыя. Пра гэта сведчаць вынікі апытання, праведзенага сэрвісам знаёмстваў Chyrpe. На іх звяртае ўвагу New York Post.
Каго насамрэч шукаюць жанчыны
Паводле апытання, 63% жанчын аддаюць перавагу мужчынам, якія аказваюць эмацыйную падтрымку, адкрыта гавораць пра свае пачуцці і гатовыя дазволіць партнёрцы праяўляць ініцыятыву. Пры гэтым 44% заявілі, што не сталі б мэтанакіравана шукаць так званага альфа-самца.
Толькі 3% апытаных назвалі імкненне кантраляваць партнёрку прывабнай мужчынскай рысай. Дамінантнасць важная для 9%, а рашучасць і напорыстасць аказаліся прыярытэтам для 16%.
Апытанне таксама выявіла разыходжанне паміж рамантычнымі фантазіямі і рэальнымі чаканнямі ад адносін. Каля 45% жанчын пагадзіліся, што дамінантныя альфа-самцы могуць выглядаць прывабна ў мастацкіх творах, але не абавязкова ў рэальным жыцці.
Больш за палову апытаных, 54%, лічаць, што адносіны з такім мужчынам часта становяцца аднабаковымі, калі яго ўласныя жаданні і патрэбы аказваюцца важнейшымі за патрэбы партнёркі.
Чаму мужчыны працягваюць імкнуцца быць альфа-самцамі
Нягледзячы на такія перавагі жанчын, мужчыны па-ранейшаму адчуваюць ціск, які прымушае іх адпавядаць традыцыйнаму вобразу мужнасці. Кожны трэці з апытаных мужчын (35%) прызнаўся, што сябры высмейваюць яго, калі ён не займае дамінантную пазіцыю ў адносінах. Яшчэ 37% адчуваюць падобны ціск з боку сацыяльных сетак.
Пры гэтым мужчыны не заўсёды правільна ўяўляюць, якія якасці ў вачах жанчын прыярытэтныя. Напрыклад, падтрымку цэняць амаль дзве з трох апытаных жанчын (62%), але толькі кожны другі мужчына (48%) лічыць, што жанчыны надаюць ёй такое значэнне. Падобная розніца назіраецца ў ацэнцы важнасці вернасці (61% жанчын супраць 46% мужчын), дабрыні (58% супраць 40%) і ўмення слухаць (52% і 41%).
Экспертка па адносінах кампаніі Chyrpe Джыджы Энгл тлумачыць гэты разрыў традыцыйнымі ўяўленнямі пра мужчынскія і жаночыя ролі. Мужчын звычайна вучаць быць ініцыятыўнымі і ўсё кантраляваць, а ад жанчын чакаюць, што яны не будуць прымаць мужчынскія рашэнні.
Тры міфы, у якія мужчынам трэба перастаць верыць
На думку Энгл, мужчынам варта перагледзець тры распаўсюджаныя перакананні.
Першае заключаецца ў тым, што менавіта мужчына заўсёды павінен рабіць першы крок. Экспертка лічыць, што жанчыны таксама могуць самі знаёміцца, запрашаць на спатканні і адкрыта выказваць свае жаданні.
Другое перакананне звязанае з тым, што мужчына абавязкова павінен кіраваць адносінамі. Аднак некаторыя пары свядома выбіраюць мадэль, у якой большую ініцыятыву бярэ жанчына, і такі падыход можа задавальняць абаіх партнёраў.
Трэцяе заключаецца ў тым, што жанчыны, якія ведаюць, чаго хочуць, і адкрыта гавораць пра свае патрэбы, нібыта выглядаюць занадта ўладнымі. Паводле Энгл, у здаровых адносінах абое партнёраў павінны мець магчымасць выказваць свае жаданні, не баючыся асуджэння.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2929
Каментары
Гэта толькі ў думках, спаць жа яны жадаюць як і раней з рашучымі мужчынамі.