У Беларусі немагчыма выклікаць «Яндэкс-таксі» пасля атакі дронаў на дата-цэнтр ва Уладзіміры
У ноч на 11 кастрычніка дроны атакавалі дата-цэнтр «Яндэкса» ў расійскім Уладзіміры. Яго праца цалкам спынілася. Карыстальнікі ў некалькіх краінах, у тым ліку Беларусі, паведамляюць пра масавыя збоі ў працы сэрвісаў. У Беларусі немагчыма выклікаць таксі. Гэта ўжо трэці дата-цэнтр кампаніі, атакаваны за чатыры дні.
Пасля атакі дронаў на чарговы дата-цэнтр карыстальнікі сэрвісу не могуць замовіць таксі ў Маскве, Пецярбургу, Екацярынбургу, Уладзівастоку і іншых расійскіх гарадах. Памылкі пры выкліку машыны ўзнікаюць таксама ў Казахстане, Арменіі і Сербіі. Немагчыма выклікаць таксі сэрвісу і ў Беларусі.
Кіроўцы паведамляюць, што не могуць увайсці ў свае акаўнты, а ў тых, у каго праграма яшчэ працуе, збілася навігацыя. Пасажырам паказвае, што свабодных машын няма.
Паводле канала «Осторожно, новости», перастаў працаваць дадатак «Яндекс Про», якім карыстаюцца таксісты і кур’еры. Збоі закранулі і ўнутраныя праграмы супрацоўнікаў падтрымкі.
Чытачы ASTRA таксама скардзяцца на недаступнасць дадаткаў Fix Price і «Магніт». Праз збой у «Яндекс Pay» частка карыстальнікаў паведамляе пра праблемы з доступам да сваіх грошай.
Атакаваны дата-цэнтр знаходзіцца ў мікрараёне Энергетык. ASTRA вызначыла месца пажару па фотаздымках, дасланых чытачамі. Паводле відавочцаў, дымам завалакло Ленінскі раён Уладзіміра.
«Яндэкс» пацвердзіў, што інфраструктура дата-цэнтра пашкоджаная ў выніку атакі беспілотнікаў, а яго праца цалкам спыненая. Паводле кампаніі, пацярпелых няма. Спецыялісты ацэньваюць шкоду; тэрмінаў аднаўлення пакуль не называюць.
Губернатар Уладзімірскай вобласці Аляксандр Аўдзееў паведаміў, што пасля атакі адключыліся дзве падстанцыі, якія забяспечваюць электрычнасцю пяць тысяч жыхароў. З найбліжэйшых да атакаванага аб’екта дамоў эвакуявалі людзей. Паводле яго, разбурэння жылых дамоў удалося пазбегнуць.
Гэта трэцяя атака на дата-цэнтры «Яндэкса» за апошнія дні. 8 кастрычніка быў атакаваны аб’ект у Сасаве Разанскай вобласці, 9 кастрычніка — у Калузе. Пасля гэтых удараў кампанія таксама паведамляла пра пашкоджанні і перабоі ў працы сэрвісаў.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5959
Каментары
Заказывайце таксі ў шэфа, яно не патрабуе замежнага чабурнету.