Скардзіўся на болі, а потым знік. Як ідуць пошукі мінчука, які прапаў два тыдні таму
Пад Мінскам працягваюцца пошукі Аляксандра Наркевіча. Асноўная версія: зніклы застаўся ў лесе.
41‑гадовы мужчына перастаў выходзіць на сувязь днём 29 верасня — з таго часу пра яго месцазнаходжанне нічога не вядома. Жонка зніклага паведаміла, што апошнія некалькі тыдняў перад знікненнем Аляксандр скардзіўся на невытлумачальныя болі і знаходзіўся ў вельмі прыгнечаным эмацыйным стане.
Раніцай 30 верасня ў Смалявіцкім раёне знайшлі машыну сям'і. Аўтамабіль быў зачынены, у салоне не было тэлефона, працоўнага планшэта, ключоў ад дзвюх кватэр і кашалька, якія мужчына ўзяў з сабой, калі ў дзень знікнення збіраўся на працу.
Усе гэтыя рэчы, як і іншыя сляды Аляксандра, па стане на 9 кастрычніка так і не былі знойдзены ні ў найбліжэйшым лясным масіве, ні дзе-небудзь яшчэ.
Пра стан пошукаў Onliner расказаў Павел Яхімовіч, кіраўнік пошукава-выратавальнага атрада «Сірыус»:
— На сённяшні дзень вельмі добра праведзена інфармацыйная праца ў найбліжэйшых населеных пунктах — арыенціроўкамі абклеены ўсе вёскі. Супрацоўнікі міліцыі абследавалі ўсе найбліжэйшыя закінутыя будынкі. Што тычыцца пошукавікаў, то людзі двойчы працавалі на вадзе — у суботу і ўчора. У пошуках актыўна ўдзельнічаюць блізкія і сябры мужчыны.
Разам з пешымі групамі на месцы працуюць і кінолагі. У чацвер задзейнічалі тры кіналагічныя разлікі, а на мінулым тыдні тэрыторыю абследавалі два сабакі. У гэтых пошуках іх выкарыстанне асабліва апраўданае, улічваючы вялікую колькасць забалочаных і цяжкапраходных участкаў.
Асноўная версія: зніклы застаўся ў прыродным асяроддзі.
Таксама ёсць версія, што ён, улічваючы свой стан, усё ж мог, пакінуўшы машыну, пайсці куды-небудзь у населеныя пункты. Паколькі мужчына казаў блізкім, што хоча пабыць адзін, гэты варыянт таксама канчаткова не адкідаем.
Узнікае пытанне: што наогул звязвала Аляксандра, які, як вядома, пражывае ў Фрунзенскім раёне сталіцы, з наваколлем Смалявіч? Мяркуючы па ўсім, нічога.
Ва ўсякім разе, ні сваякі, ні сябры не змаглі ўспомніць ніякіх падрабязнасцей. Зніклы мужчына — заўзяты рыбак, аднак яго таварыш па захапленні сцвярджаў, што Аляксандр ні разу не ездзіў рыбачыць у гэтыя месцы.
— Цяпер да пошукаў будзем прыцягваць у асноўным найбольш падрыхтаваных пошукавікаў і кіналагічныя разлікі. Калі дазволіць надвор'е, наступны маштабны выезд правядзём у нядзелю. Далей у любым выпадку будзем пашыраць радыус, але ўжо пачнецца праца менавіта на затопленых участках разам з МНС, супрацоўнікамі міліцыі і вопытнымі пошукавікамі. Непадрыхтаваных людзей — валанцёраў, сяброў і сваякоў — туды дакладна ніхто не адправіць.
Просьба да ўсіх, хто бачыў Аляксандра 29 верасня пасля 15:00 або валодае інфармацыяй пра яго месцазнаходжанне, паведаміць у атрад: +375 25 633— 28‑03 або ў міліцыю (102).
Каментары
[Зрэдагавана]