У Варшаве 21‑гадовая дзяўчына напала з нажом на трох дзяўчат у комплексе школ для дарослых. У выніку нападу пацярпелі дзве непаўналетнія ва ўзросце 17 гадоў і 24‑гадовая жанчына, паведаміў Polsat.
Здарэнне адбылося перад сакратарыятам навучальнай установы на вуліцы Мінскай у варшаўскім раёне Прага. Паведамленне пра напад паступіла ў экстранныя службы каля 12:30. Паводле камісара Яцэка Вішнеўскага, паліцыя прыбыла на месца ўжо праз чатыры хвіліны.
Адну з 17‑гадовых дзяўчат даставілі ў бальніцу з рэзанымі ранамі перадплечча. Яе стан не пагражаў жыццю. Двум іншым пацярпелым шпіталізацыя не спатрэбілася.
Нападніцу абясшкодзіў супрацоўнік навучальнай установы, пасля чаго перадаў яе паліцыі. Калі праваахоўнікі прыбылі на месца, яны ўжо змаглі канфіскаваць у дзяўчыны нож.
Матывы нападу пакуль не высветленыя. Па словах паліцыі, няма пацвярджэнняў таго, што нападніца і адна з пацярпелых былі знаёмыя. Вядома, што 21‑гадовая дзяўчына вучыцца ў гэтай установе, а 24‑гадовая жанчына прыйшла туды ў дзень здарэння, каб падаць дакументы. Следчыя праводзяць неабходныя дзеянні ў дачыненні да падазраванай і апытваюць дзвюх пацярпелых, якім не спатрэбілася шпіталізацыя.
Напад адбыўся на фоне шэрагу іншых інцыдэнтаў у польскіх навучальных установах. Пасля трагічных падзей у школах Мазавецкага ваяводства польская паліцыя праверыла амаль 50 тысяч навучальных устаноў. Па ўсёй краіне затрымалі 76 чалавек і зафіксавалі больш за 230 інцыдэнтаў.
У чацвер у пачатковай школе ў вёсцы Ляшчыдул-Навіны Вышкаўскага павета 15‑гадовы падлетак, які раней там вучыўся, напаў з нажом на трох чалавек, у тым ліку на супрацоўніцу школы і дырэктара. Жанчына памерла, нягледзячы на спробы рэанімацыі.
Напярэдадні дзевяць чалавек атрымалі раненні падчас нападу ў комплексе прафесійных школ № 4 у польскім горадзе Астралэнка. У сераду ў горадзе Серпц паліцэйская аперацыя дазволіла прадухіліць яшчэ адзін напад.
Цяпер чытаюць
А што будзе, калі вярнуцца ў Беларусь? Кажуць жа, што рэпрэсіі заканчваюцца3
А што будзе, калі вярнуцца ў Беларусь? Кажуць жа, што рэпрэсіі заканчваюцца
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары