Syrski ličyć, što rasijanie buduć nastupać na Čarnihaŭščynu z Branskaj vobłaści. A voś ź Biełarusi — naŭrad ci
Hałoŭnakamandujučy Uzbrojenych sił Ukrainy Alaksandr Syrski ŭ intervju ŭkrainskamu telekanału TSN zajaviŭ, što, pavodle acenki ŭkrainskaha kamandavańnia, rasijski Hienieralny štab padrychtavaŭ niekalki varyjantaŭ novych nastupalnych dziejańniaŭ suprać Ukrainy.
Pavodle źviestak Syrskaha, najbolš vierahodnym scenaryjem źjaŭlajecca nastupleńnie z terytoryi Branskaj vobłaści ŭ kirunku Čarnihaŭskaj vobłaści. Pavodle Syrskaha, hałoŭnaja meta takoj apieracyi — nie zachop Kijeva, a raściahvańnie linii frontu i prymušeńnie Ukrainy pierakinuć častku svaich vojskaŭ ź inšych učastkaŭ, dzie ciapier iduć najbolš aktyŭnyja bajavyja dziejańni.
Jon taksama paviedamiŭ, što ŭ Rasii razhladali mahčymaść praviadzieńnia nastupalnaj apieracyi z terytoryi Biełarusi. Adnak, na jaho dumku, paśla apošnich padziej biełaruskija ŭłady naŭrad ci pahodziacca znoŭ vykarystać svaju terytoryju jak płacdarm dla nastupleńnia. Razam z tym ukrainskaje kamandavańnie ŭličvaje i taki varyjant raźvićcia padziej.
U apošnija miesiacy Ukraina ŭzmacniaje abaronu svajoj paŭnočnaj miažy. Na Paleśsi budujucca novyja fartyfikacyjnyja zbudavańni i minnyja zaharody. Raniej prezident Ukrainy Uładzimir Zialenski zajaŭlaŭ, što nieabchodnaść dadatkovaha ŭmacavańnia Čarnihaŭskaha i Kijeŭskaha napramkaŭ źviazanaja z mahčymym uzmacnieńniem cisku Rasii na Alaksandra Łukašenku, kab jašče hłybiej uciahnuć Biełaruś u vajnu.
Niekalki dzion tamu Alaksandr Syrski paviedamiŭ pra stvareńnie novych padraździaleńniaŭ bieśpiłotnych sistem dla prykryćcia paŭnočnaha napramku. U svaju čarhu, kamandujučy Nacyjanalnaj hvardyjaj Ukrainy Alaksandr Piŭnienka adznačaŭ, što maštabnaje rasijskaje nastupleńnie na hetym učastku mahčymaje tolki ŭ vypadku kancentracyi kala 70 tysiač vajskoŭcaŭ kala miažy. Pry hetym jon padkreśliŭ, što ŭkrainskija siły rychtujucca nie dapuścić paŭtareńnia padziej pačatku 2022 hoda, kali terytoryja Biełarusi vykarystoŭvałasia dla nastupleńnia na Kijeŭ.
Kamientary