Scenar, pry jakim Rasija atrymaje adčuvańnie pieramohi va Ukrainie, biełaruskija ekśpierty ličać samym niebiaśpiečnym dla Biełarusi

Kali vajna va Ukrainie narešcie skončycca, heta jašče nie budzie aznačać, što Biełaruś aŭtamatyčna atrymaje šaniec viarnucca da narmalnych adnosin ź Jeŭropaj. Naadvarot, mienavita paśla spynieńnia bajavych dziejańniaŭ dla Minska moža pačacca novy, nie mienš składany etap.

Dyskusija pra paślavajennuju architekturu biaśpieki ŭ Jeŭropie ŭžo vyjšła za miežy vyklučna ŭkrainskaha pytańnia. Na Zachadzie ŭsio čaściej abmiarkoŭvajuć nie tolki toje, jak moža skončycca vajna, ale i što budzie paśla jaje, u tym liku ź Biełaruśsiu, jakaja za apošnija hady pieratvaryłasia ŭ klučavoha vajennaha sajuźnika Rasii na zachodnim kirunku. 

Mienavita hetym pytańniam pryśviečana daśledavańnie «Biełaruś paśla mahčymaha mirnaha ŭrehulavańnia vajny va Ukrainie: scenary, ryzyki i mahčymaści dla Jeŭrapiejskaha sajuza», padrychtavanaje ekśpiertami biełaruskich analityčnych centraŭ Sense Analytics Arciomam Šrajbmanam, Lvom Lvoŭskim z BEROC, a taksama ekśpiertami iSANS. Jaho aŭtary nie sprabujuć pradkazać budučyniu. Zamiest hetaha jany prapanujuć try najbolš imaviernyja scenary raźvićcia padziej paśla mahčymaj mirnaj damovy pamiž Ukrainaj i Rasijaj i analizujuć, što kožny ź ich budzie aznačać dla Biełarusi, Jeŭrapiejskaha sajuza i ŭsioj sistemy biaśpieki va Uschodniaj Jeŭropie.

Razam z tym, hetyja scenary pabudavanyja na šerahu dapuščeńniaŭ, jakija mohuć nie spraŭdzicca. U pryvatnaści, daśledčyki zychodziać z taho, što Łukašenka zachavaje ŭładu i stabilnuju sistemu ŭnutry Biełarusi. Chacia apošnija hady pakazali, što padziei ŭ rehijonie mohuć raźvivacca značna chutčej, čym prahnazujuć navat samyja aściarožnyja analityki.

Hałoŭnaja vysnova daśledavańnia davoli prostaja: zakančeńnie vajny nie aznačaje zakančeńnia biełaruskaha kryzisu, a los Biełarusi budzie zaležać ad taho, na jakich umovach skončacca bajavyja dziejańni. Pry hetym navat paśla miru kraina moža nie stać samastojnym hulcom: jana moža zastacca mocna zaležnaj ad Rasii ŭ pytańniach biaśpieki, ekanomiki i palityki.

Paśla miru Jeŭropa sutykniecca z novymi vyklikami. Jak strymlivać rasijskuju vajskovuju prysutnaść u Biełarusi? Ci možna vieści dyjałoh ź Minskam, nie lehitymizujučy režym Łukašenki? Jak nie dapuścić kančatkovaha adryvu biełaruskaha hramadstva ad Jeŭropy? I što rabić, kali padychody ZŠA i ES da Biełarusi pačnuć razychodzicca?

Try mahčymyja scenary

Ekśpierty razhladajuć try bazavyja varyjanty raźvićcia padziej.

Pieršy — zachavańnie status-kvo. Vajna praciahvajecca da kanca 2026 hoda, front amal nie źmianiajecca, a nivodzin z bakoŭ nie zdolny naviazać praciŭniku svaje ŭmovy. Zachad praciahvaje padtrymlivać Ukrainu, ale ŭsio bolšuju rolu pačynajuć adyhryvać unutrypalityčnyja prablemy ZŠA i Jeŭropy. Sankcyi suprać Rasii i Biełarusi zachoŭvajucca, a hałoŭnaja ŭvaha nadajecca kantrolu za ich vykanańniem.

Druhi scenar — «zbałansavanaja damova». Jon ličycca najbolš spryjalnym z realistyčnych varyjantaŭ dla Ukrainy i jaje sajuźnikaŭ. Maskva prychodzić da vysnovy, što praciah vajny stanovicca daražejšym za kampramis. Hetamu mohuć spryjać zapavoleńnie rasijskaha nastupleńnia, ekanamičnyja ciažkaści, praciah zachodniaj padtrymki Kijeva i efiektyŭnyja ŭdary pa rasijskaj vajskovaj i enierhietyčnaj infrastruktury.

U hetaj madeli pry kancy 2026 hoda zaklučajecca pieramirje. Rasija zhadžajecca zamarozić liniju frontu, Ukraina idzie na abmiežavanyja palityčnyja sastupki, naprykład, admaŭlajecca ad ustupleńnia ŭ NATA, ale atrymlivaje nadziejnyja harantyi biaśpieki i dostup da mižnarodnaha fondu adnaŭleńnia. Pry hetym Zachad nie śpiašajecca sa skasavańniem sankcyj suprać Maskvy.

Treci scenar — «damova na karyść Rasii». Jon praduhledžvaje značna mienš vyhadnyja dla Kijeva ŭmovy. Ukraina hublaje mahčymaść praciahvać vajnu praź niedachop vajskovaj dapamohi, a ZŠA faktyčna schilajuć jaje da pryniaćcia rasijskich patrabavańniaŭ. U vyniku Kijeŭ adrakajecca častki akupavanych terytoryj, abaviazvajecca nie ŭstupać u NATA i istotna skaračaje svaje ŭzbrojenyja siły. U takim vypadku Jeŭropa taksama pastupova źmiakčaje cisk na Maskvu, a častka sankcyj moža być admienienaja.

Za niekalki miesiacaŭ acenki ŭžo źmianilisia

Padčas prezientacyi daśledavańnia aŭtary pryznali, što za toj čas, jaki prajšoŭ ad jaho padrychtoŭki, situacyja na froncie ŭžo paśpieła źmianicca. Kali niekalki miesiacaŭ tamu scenar «drennaj damovy» dla Ukrainy zdavaŭsia im bolš imaviernym, to ciapier acenki stali bolš aptymistyčnymi. 

Siońnia najbolš imaviernym pa-raniejšamu zastajecca zachavańnie status-kvo. Adnak scenar «zbałansavanaj damovy» ŭžo vyhladaje bolš imaviernym, čym scenar, pry jakim Ukraina budzie vymušana pajści na niavyhadnyja dla siabie ŭmovy.

Razam z tym ekśpierty pryznajuć, što apošnija miesiacy prynieśli i novuju pahrozu, jakoj u daśledavańni amal niama. Jany nie vyklučajuć scenar haryzantalnaj eskałacyi — kali vajna raspaŭsiudzicca i na terytoryju Biełarusi.

Pavodle ich acenak, taki ryzykoŭny varyjant staŭ bolš imaviernym paśla taho, jak Rasija apynułasia pierad nieabchodnaściu vyrašać pytańnie novaj chvali mabilizacyi. Kali Kreml pojdzie na hety krok, častka novych padraździaleńniaŭ moža być pierakinutaja ŭ Biełaruś — dla padrychtoŭki, manieŭraŭ abo navat vykarystańnia biełaruskaj terytoryi dla novych udaraŭ pa Ukrainie. Mienavita tamu hety scenar aŭtary nazyvajuć «drennym status-kvo».

Pavialičyć

Ekanomika: biez abvału, ale i bieź pierśpiektyŭ dla rostu

Kali palityčnyja nastupstvy paślavajennaha ŭrehulavańnia mohuć istotna adroźnivacca ŭ zaležnaści ad scenaru, to ŭ ekanomicy daśledčyki značna bolš adnaznačnyja: nivodzin z mahčymych varyjantaŭ nie abiacaje Biełarusi prykmietnaha ekanamičnaha praryvu.

Pavodle ich acenak, biełaruskaja ekanomika ŭžo pieražyła samy ciažki etap paśla pačatku poŭnamaštabnaj vajny. Paśla rezkaha padzieńnia ŭ 2022 hodzie jana častkova adnaviłasia dziakujučy rasijskamu rynku, ale prykładna ź siaredziny 2024 hoda faktyčna ŭvajšła ŭ fazu stahnacyi.

Hałoŭnym faktaram rostu apošnich hadoŭ staŭ rasijski popyt, jaki dazvoliŭ biełaruskim pradpryjemstvam častkova kampiensavać stratu jeŭrapiejskich rynkaŭ. Adnak ciapier hetaja madel pačynaje vyčerpvacca. Rasijskaja ekanomika zapavolvajecca, adpaviedna słabieje i popyt na biełaruskija tavary.

Adnačasova ŭsio bolš surjoznaj prablemaj stanovicca deficyt pracoŭnaj siły. Pradpryjemstvy vymušanyja pavyšać zarobki, kab utrymać supracoŭnikaŭ, ale mahčymaści dla takoha rostu nie biaźmiežnyja.

Navat najbolš spryjalny dla Biełarusi scenar — «zbałansavanaja damova» — nie adkryvaje chutkaha šlachu da ekanamičnaha adnaŭleńnia. Jeŭrapiejski sajuz, ličać aŭtary daśledavańnia, nie budzie masava zdymać sankcyi tolki tamu, što vajna spyniłasia.

Chutčej možna čakać pastupovaha źmianšeńnia tak zvanaj «sankcyjnaj taksičnaści»: adkryćcia častki punktaŭ propusku, adnaŭleńnia asobnych łahistyčnych maršrutaŭ, palahčeńnia transpartnych suviaziaŭ i abmiežavanaha pašyreńnia handlu. Ale heta nie aznačaje viartańnia Biełarusi na jeŭrapiejski rynak u tym vyhladzie, u jakim jon isnavaŭ da 2020 hoda.

Zusim inšaja situacyja moža ŭźniknuć, kali paślavajennaje pahadnieńnie budzie vyhadnym dla Rasii. Tady ZŠA i krainy Jeŭrasajuza mohuć pajści na častkovaje źmiakčeńnie sankcyj suprać Maskvy, a razam ź joj — i suprać Minska.

Paradoks u tym, što ŭ takim vypadku Biełaruś moža atrymać ekanamičnyja dyvidendy nie z-za palityčnych źmienaŭ unutry krainy, a prosta tamu, što Zachadu budzie patrebna ŭstojlivaje mirnaje pahadnieńnie z Rasijaj. Inšymi słovami, biełaruskija ŭłady mohuć atrymać palahčeńnie sankcyjnaha režymu biez vyzvaleńnia palitviaźniaŭ, biez spynieńnia represij i biez pamianšeńnia zaležnaści ad Maskvy. Mienavita hety scenar aŭtary ličać adnym z samych niebiaśpiečnych dla ŭsioj sankcyjnaj palityki Jeŭrasajuza.

Što kožny sa scenaroŭ budzie aznačać dla Biełarusi

Niahledziačy na roznyja varyjanty zakančeńnia vajny, daśledčyki prychodziać da adnoj ahulnaj vysnovy: nivodzin sa scenaroŭ nie aznačaje chutkaha viartańnia Biełarusi da narmalnych adnosin z Zachadam.

Va ŭsich vypadkach Minsk zastaniecca mocna zaležnym ad Maskvy. Roźnica budzie ŭ tym, nakolki hłybokaj stanie hetaja zaležnaść, maštabie represij i mahčymaściach dla abmiežavanaha dyjałohu ź Jeŭrapiejskim sajuzam.

Kali vajna praciahniecca

Kali situacyja na froncie istotna nie źmienicca, Biełaruś faktyčna zastaniecca ŭ siońniašnim stanie. Jeŭrapiejski sajuz praciahnie razhladać jaje jak najbližejšaha sajuźnika Rasii. Asnoŭnaja ŭvaha budzie nadavacca ŭžo nie pašyreńniu sankcyj, a baraćbie sa schiemami ich abychodu.

ZŠA, pavodle daśledavańnia, mohuć praciahnuć aściarožny vybaračny dyjałoh ź Minskam. Jon budzie tyčycca pieradusim humanitarnych pytańniaŭ — vyzvaleńnia palitviaźniaŭ, pracy amierykanskaj ambasady abo źnižeńnia ryzyki dalejšaha ŭciahvańnia Biełarusi ŭ vajnu. Ale pra sapraŭdnuju narmalizacyju adnosin havorki nie budzie.

Sam Łukašenka, chutčej za ŭsio, taksama budzie sprabavać adnavić asobnyja ekanamičnyja kantakty z Zachadam, nie źmianiajučy svajoj palityki. Jon praciahnie padtrymlivać Rasiju, ale adnačasova budzie šukać mahčymaści atrymać vyhadu ad abmiežavanaha supracoŭnictva ź Jeŭropaj.

Unutry krainy analityki taksama nie čakajuć istotnych pieramien. Represii, chutčej za ŭsio, praciahnucca, chacia ich formy mohuć stać mienš demanstratyŭnymi. Zamiest novych kryminalnych spraŭ ułady čaściej buduć vykarystoŭvać administracyjny pieraśled, zvalnieńni i inšyja formy cisku.

Nie źmienicca i hałoŭnaja pahroza dla rehijanalnaj biaśpieki — rasijskaja vajskovaja prysutnaść u Biełarusi. Pry hetym aŭtary daśledavańnia adznačajuć cikavuju detal. Na ich dumku, niama dastatkovych padstaŭ śćviardžać, što rasijskaja taktyčnaja jadziernaja zbroja ŭžo raźmieščanaja ŭ Biełarusi. Pakul Kreml vykarystoŭvaje hetuju temu pieradusim jak elemient palityčnaha i infarmacyjnaha cisku. Razam z tym mahčymaść jaje realnaha raźmiaščeńnia ŭ budučyni daśledčyki nie vyklučajuć.

Adnosiny pamiž Minskam i Kijevam taksama zastanucca minimalnymi. Ukraina i dalej budzie ŭsprymać Biełaruś jak vajennaha sajuźnika Rasii, tamu supracoŭnictva budzie abmiežavanaje tolki nieabchodnymi techničnymi i humanitarnymi kantaktami.

Pavialičyć

Kali budzie kampramisny mir

Najbolš pierśpiektyŭnym dla Biełarusi aŭtary daśledavańnia ličać scenar tak zvanaj «zbałansavanaj damovy». Ale navat u hetym vypadku jany nie čakajuć rezkaha pavarotu krainy ŭ bok Zachadu.

Rasijski ŭpłyŭ nikudy nie źniknie. Biełaruś zastaniecca častkaj rasijskaj sistemy biaśpieki, a jaje vajskovaja zaležnaść ad Maskvy jašče doŭha budzie vyznačać staŭleńnie Jeŭropy da Minska.

Razam z tym mienavita hety scenar pakidaje najbolš prastory dla aściarožnaha dyjałohu.

Jeŭrapiejski sajuz, chutčej za ŭsio, nie stanie maštabna skasoŭvać sankcyi, ale moža viarnucca da abmierkavańnia asobnych praktyčnych pytańniaŭ. Havorka moža iści pra adkryćcio dadatkovych punktaŭ propusku, adnaŭleńnie łahistyčnych maršrutaŭ, pašyreńnie humanitarnych kantaktaŭ abo ŭdzieł jeŭrapiejskaha biznesu ŭ asobnych prajektach.

Adnym z hałoŭnych elemientaŭ takoha dyjałohu mohuć stać palitviaźni. Ekśpierty nie vyklučajuć, što Minsk budzie vykarystoŭvać ich vyzvaleńnie jak pradmiet pieramoŭ z Zachadam. Ale havorka, chutčej za ŭsio, pojdzie pra pastupovy abmien sastupkami, a nie pra radykalnyja palityčnyja źmieny.

Pry hetym padčas prezientacyi daśledavańnia aŭtary ahučyli bolš aptymistyčnuju acenku. Kali ŭ daśledavańni jašče dapuskałasia, što značnaja kolkaść palitviaźniaŭ moža zastavacca za kratami i pry kancy 2026 hoda, to ciapier ekśpierty nie vyklučajuć, što pry najbolš spryjalnym raźvićci padziej da kanca 2026 — pačatku 2027 hoda hetaja prablema moža być u značnaj stupieni vyrašanaja.

Adnak heta, na ich dumku, nie budzie aznačać kanca represij. Chutčej za ŭsio, dziaržava prosta źmienić ich formu. Zamiest masavych palityčnych pracesaŭ bolš aktyŭna buduć vykarystoŭvacca kropkavy cisk, prafiłaktyčnyja zatrymańni, administracyjnyja spravy i inšyja miechanizmy kantrolu, jakija značna ciažej zaŭvažać i dakumientavać.

Z Ukrainaj taksama nie varta čakać chutkaha prymireńnia. Navat pry samym spryjalnym scenary Kijeŭ praciahnie ŭsprymać Biełaruś jak krainu, praz terytoryju jakoj išło rasijskaje ŭvarvańnie. Tamu havorka moža iści tolki pra adnaŭleńnie asobnych transpartnych, łahistyčnych i humanitarnych kantaktaŭ, ale nie pra sapraŭdnaje palityčnaje partniorstva.

Kali damova budzie vyhadnaj dla Rasii

Najbolš niespryjalnym dla Biełarusi daśledčyki ličać scenar, pry jakim Rasija atrymaje adčuvańnie pieramohi, a Zachad budzie imknucca jak maha chutčej narmalizavać adnosiny z Maskvoj. U hetym vypadku Biełaruś ryzykuje jašče macniej zamacavacca ŭ rasijskaj śfiery ŭpłyvu.

Asłableńnie sankcyj moža prynieści Minsku karotkaterminovuju ekanamičnuju vyhadu, ale adnačasova jašče bolš pavialičyć jaho zaležnaść ad Kramla. Łukašenka atrymaje mahčymaść palepšyć ekanamičnaje stanovišča krainy, nie mianiajučy ni ŭnutranuju palityku, ni adnosiny da Zachadu.

Mienavita hety scenar, ličać aŭtary, moža stać surjoznym vyprabavańniem i dla samoha Jeŭrapiejskaha sajuza.

Pazicyi jaho členaŭ, imavierna, razyducca. Častka dziaržaŭ budzie nastojvać na adnaŭleńni ekanamičnaha supracoŭnictva ź Biełaruśsiu i Rasijaj, spasyłajučysia na nieabchodnaść stabilizacyi rehijona. Inšyja, pieradusim krainy Bałtyi i Polšča, buduć ličyć, što Biełaruś pa-raniejšamu zastajecca hałoŭnym rasijskim vajskovym płacdarmam na zachodniaj miažy.

Nie vyklučajuć daśledčyki i ŭzmacnieńnia rasijskaj vajskovaj prysutnaści. Paśla zakančeńnia bajavych dziejańniaŭ Maskva moža pierakinuć u Biełaruś častku padraździaleńniaŭ, vyzvalenych z ukrainskaha frontu, vykarystaŭšy ich dla stvareńnia novaj vajskovaj infrastruktury, rehularnych vučeńniaŭ abo pastajannaha bazavańnia. Dla Ukrainy heta aznačała b zachavańnie vysokaha ŭzroŭniu pahrozy navat paśla zakančeńnia vajny.

Jak adznačyli aŭtary padčas prezientacyi, u lubym sa scenaroŭ klučavym słovam dla charaktarystyki adnosin Kijeva da Minska zastaniecca «taksičnaść». Davier pamiž dźviuma krainami budzie adnaŭlacca vielmi pavolna, a palityčny dyjałoh jašče doŭha budzie abmiežavany.

Što ŭsio heta aznačaje dla Jeŭropy

Dla Jeŭrapiejskaha sajuza daśledčyki vyłučajuć čatyry hałoŭnyja vykliki.

Pieršy — vajskovy. Biełaruskaja terytoryja ŭžo siońnia vykarystoŭvajecca Rasijaj jak elemient jaje vajskovaj infrastruktury. Paśla zakančeńnia vajny hetaja rola moža ŭzraści.

Pry hetym havorka idzie nie tolki pra mahčymyja vojski abo rakiety. Biełaruś užo stała placoŭkaj dla hibrydnych pahroz — arhanizavanaj mihracyi, infarmacyjnych apieracyj, kibiernapadaŭ i pravakacyj na miežach Jeŭrasajuza.

Druhi vyklik — pastupovaja strata biełaruskaj subjektnaści. Kali ŭvaha Zachadu budzie skancentravanaja vyklučna na Rasii i Ukrainie, Biełaruś moža kančatkova zamacavacca ŭ rasijskaj palityčnaj, ekanamičnaj i infarmacyjnaj prastory.

Treci — raskoł pamiž zachodnimi sajuźnikami. Aŭtary daśledavańnia nie vyklučajuć, što paśla zakančeńnia vajny padychody ZŠA i Jeŭrapiejskaha sajuza da Biełarusi mohuć pačać razychodzicca. Pavodle ich acenak, Vašynhton moža zrabić staŭku na bolš prahmatyčny dyjałoh ź Minskam. Dla ZŠA Biełaruś moža stać adnym z elemientaŭ bolš šyrokich pieramoŭ z Rasijaj pra budučuju architekturu biaśpieki ŭ Jeŭropie. 

Jeŭrapiejski sajuz, naadvarot, moža zachavać bolš žorstki padychod. Dla mnohich jaho krain, pieradusim Polščy i dziaržaŭ Bałtyi, Biełaruś zastajecca niepasrednaj krynicaj pahroz — ad rasijskaj vajskovaj prysutnaści da mihracyjnaha cisku i inšych hibrydnych atak na miežach. Kali hetyja padychody sapraŭdy razyducca, Łukašenka moža pasprabavać skarystacca hetymi supiarečnaściami ŭ svaich intaresach.

I narešcie čaćviortaja pahroza — źniknieńnie Biełarusi ź mižnarodnaha paradku dnia. Kali paśla zakančeńnia vajny asnoŭnaja ŭvaha Zachadu budzie skancentravanaja na adnosinach z Rasijaj i adnaŭleńni Ukrainy, biełaruski kryzis moža adyści na druhi płan. Na dumku ekśpiertaŭ, mienavita hety scenar staŭ by adnym z samych niebiaśpiečnych, bo dazvoliŭ by Minsku i Maskvie biez asablivaj uvahi zvonku kančatkova zamacavać ciapierašniuju madel adnosin.

Što ŭsio heta moža aznačać dla biełarusaŭ

Kali čytać daśledavańnie całkam, možna zaŭvažyć, što jano nie abiacaje biełarusam chutkich dobrych navin. Navat pry najbolš spryjalnym raźvićci padziej aŭtary nie čakajuć ni chutkaj demakratyzacyi krainy, ni rezkaha pasłableńnia rasijskaha ŭpłyvu. Ale heta nie aznačaje, što paśla zakančeńnia vajny žyćcio biełarusaŭ nie moža źmianicca.

Pavialičyć

Pierš za ŭsio razmova idzie pra adnaŭleńnie kantaktaŭ ź Jeŭropaj. Za apošnija piać hadoŭ biełarusam stała značna ciažej atrymlivać šenhienskija vizy, padarožničać, padtrymlivać prafiesijnyja i asabistyja suviazi z krainami Jeŭrasajuza. Zakrytyja pamiežnyja pierachody, skaračeńnie pracy konsulstvaŭ, admiena čyhunačnych i avijaznosin faktyčna zrabili Biełaruś značna bolš izalavanaj, čym jana była jašče niekalki hadoŭ tamu.

Na dumku aŭtaraŭ daśledavańnia, mienavita heta pavinna stać adnym ź pieršych kirunkaŭ pracy Jeŭrapiejskaha sajuza paśla zakančeńnia vajny.

Havorka nie idzie pra narmalizacyju adnosin ź biełaruskimi ŭładami. Naadvarot, daśledčyki prapanujuć adździalić palityku ŭ adnosinach da režymu ad palityki ŭ adnosinach da biełaruskaha hramadstva.

Kali dazvolić situacyja ź biaśpiekaj, Jeŭropa mahła b pastupova adnaŭlać konsulskuju prysutnaść u Biełarusi, vydavać bolš šmatrazovych doŭhaterminovych vizaŭ, adkryvać novyja punkty propusku i viartać čyhunačnyja znosiny z susiednimi krainami.

Takija kroki, ličać analityki, pavinny razhladacca jak inviestycyja ŭ biełaruskaje hramadstva, a nie praz pryzmu sastupak Łukašenku.

Jany zychodziać z prostaj łohiki: čym mienš biełarusy buduć kantaktavać ź Jeŭropaj, tym macniej kraina budzie intehravacca ŭ rasijskuju palityčnuju, adukacyjnuju i infarmacyjnuju prastoru.

Nie mienš važnym daśledčyki ličać i zachavańnie padtrymki biełaruskich demakratyčnych sił. Na ich dumku, paśla zakančeńnia vajny isnuje ryzyka, što mižnarodnaja ŭvaha pieraklučycca vyklučna na adnosiny z aficyjnym Minskam. Kali heta adbudziecca, Łukašenka faktyčna atrymaje manapoliju na pradstaŭleńnie Biełarusi za miažoj.

Kab hetaha nie adbyłosia, pradstaŭniki demakratyčnych sił pavinny i dalej udzielničać u mižnarodnych dyskusijach — pra demakratyju, paślavajennuju biaśpieku, budučyniu rehijona i raźvićcio Biełarusi.

Paśla vajny hałoŭnaje pytańnie budzie ŭžo inšym

Apošnija niekalki hadoŭ Biełaruś abmiarkoŭvali hałoŭnym čynam u adnym kantekście: ci ŭstupić jana ŭ vajnu suprać Ukrainy. Daśledavańnie prapanuje pahladzieć krychu dalej.

Kali bajavyja dziejańni sapraŭdy skončacca, hałoŭnym stanie ŭžo inšaje pytańnie: ci zdoleje Biełaruś kali-niebudź vyjści z rasijskaj arbity i viarnucca ŭ jeŭrapiejskuju prastoru biaśpieki, ci paśla vajny jaje zaležnaść ad Maskvy tolki ŭzmocnicca. Praŭda, ekśpierty zusim nie razhladali varyjanta ŭnutranaha vybuchu ŭ Rasii. Choć prykmiety ŭnutranaha kryzisu źjavilisia. Nie razhladali jany i varyjanta prymianieńnia Rasijaj jadziernaj zbroi.

U kožnym razie, dla Biełarusi zakančeńnie vajny stanie pačatkam novaha etapu. I ad taho, jak buduć u hety momant dziejničać Minsk, Maskva, Brusiel i Vašynhton, a taksama — i najpierš — biełaruskaje hramadstva, budzie zaležać jak budučynia Biełarusi, tak i biaśpieka Uschodniaj Jeŭropy.

• 0
• 1
• 0
• 3
• 1
• 0
• 1
• 0