Što viadoma pra adnakurśnikaŭ-biełarusaŭ Koli Łukašenki, što skončyli ź im Piekinski ŭniviersitet
Padčas pajezdki ŭ Kitaj Alaksandr Łukašenka sustreŭsia z kiraŭnictvam Piekinskaha ŭniviersiteta, a potym vystupiŭ padčas uručeńnia dypłomaŭ vypusknikam. Siarod ich byŭ jaho syn Mikałaj i jašče čaćviora studentaŭ, a taksama ich baćki, ź jakimi palityk, pa jaho pryznańni, paznajomiŭsia tolki na ŭručeńni dypłomaŭ. «Lusterka» vyśvietliła, što viadoma pra chłopcaŭ, jakija vučylisia ŭ Piekinie razam z synam Łukašenki.
Raspavioŭ Łukašenku aniekdot pra majku z Hitleram i trapiŭ na virusny skrynšot
Dypłomy z ruk rektara Piekinskaha ŭniviersiteta i BDU razam z Kolem Łukašenkam atrymaŭ Alaksiej Haŭryčkoŭ. Hety chłopiec «zaśviaciŭsia» padčas adkrytaha ŭroka Alaksandra Łukašenki 1 vieraśnia 2022 hoda, jaki palityk pravodziŭ u BDU.
Tady jašče pieršakurśnik bijafaku Haŭryčkoŭ pradstaviŭsia pa imieni i skazaŭ, što jon — adnahrupnik Dzianisa Znaka, studenta, jaki pytańniem pra prapahandu razzłavaŭ Łukašenku.
Pierad tym jak zadać pytańnie, Haŭryčkoŭ raskazaŭ palityku aniekdot.
— Zrabiŭ sabie chłopiec majku z partretam Hitlera ŭ sercy — prylacieła niekalki ŭdaraŭ pa hałavie, źbili da paŭśmierci, a jon jašče z pakoja nie vyjšaŭ, — skazaŭ Haŭryčkoŭ, ale zała adreahavała viała, śmiajaŭsia tolki Łukašenka i sam student.
— Raniej hety aniekdot zdavaŭsia b absalutna biazhłuzdym i śmiešnym, ale ciapier ja jak čałaviek, jaki lubić historyju i cikavicca joj, časta siadžu ŭ roznych histaryčnych supolnaściach i zaŭvažyŭ tendencyju (i za apošnija niekalki hadoŭ jana tolki ŭzmacniajecca), što ludzi našaha ŭzrostu (i jany ŭbivajuć heta ŭ hałavu małodšaha pakaleńnia) pačynajuć ličyć, što Hitler mieŭ racyju, što byŭ vyzvalicielem. Ci nie ličycie vy, što treba bolš dałučać moładź da historyi, kab ludzi viedali?
Pakul Haŭryčkoŭ zadavaŭ pytańnie, za jaho śpinaj student bijafaku Raman Paŭłaŭ napisaŭ na arkušy papiery słova «Ratujcie». Heta imhnienna stała miemam, i fota z Ramanam za śpinaj Alaksieja razyšłosia pa sacsietkach i miedyja.
Ciapier 23‑hadovy Haŭryčkoŭ vučycca ŭ mahistratury. Pra heta jon raskazaŭ u profili repietytara na sajcie «Profi.ru».
— Zajmajusia daśledavańniami ŭ halinie malekularnaj hienietyki, maju navukovyja publikacyi, — prezientuje siabie Alaksiej. — Uzrovień matematyki vysoki, bo ŭ svajoj pracy šmat zajmajusia statystyčnym analizam. Viedaju anhlijskuju na vysokim uzroŭni, jość dośvied mižnarodnaha supracoŭnictva. Taksama vyvučaju kitajskuju movu ŭžo try hady. U škole ŭdzielničaŭ u alimpijadach pa chimii i bijałohii. Adpaviedna cikaviać zakazy ŭ halinach chimii, bijałohii, matematyki, kitajskaj i anhlijskaj moŭ.
Na ŭručeńnie dypłomaŭ u Piekin prylacieli ź Minska i baćki Alaksieja. I kali pra baćku ŭ adkrytych krynicach infarmacyi niama, to pra maci jość. Natalla Haŭryčkova pracuje zahadčycaj dziciačaha sada-jaślaŭ № 76 u stalicy.
Jana traplała na vokładku profilnaha časopisa ŭ lipieni 2021 hoda. Udzielničała ŭ respublikanskich źjezdach rabotnikaŭ dziciačych sadkoŭ i pravodziła roznyja sieminary.
Vyras z maci-siłavikom i hraŭ roli ŭ teatry fakulteta
Prysutničaŭ na tym rezanansnym adkrytym uroku Łukašenki i Uładzisłaŭ Ściapanaŭ. Vypusknik škoły № 19 Minska, jon taksama pastupiŭ na bijafak BDU pa śpiecyjalnaści «bijatechnałohija».
Hady navučańnia ŭ dvuch univiersitetach razam ź Mikałajem Łukašenkam Ściapanaŭ apisvaje łakanična:
— Heta było ciažka i kłasna. Było nasyčana, jarka, vielmi zapaminalna. Ja ŭdzielničaŭ u vialikaj kolkaści alimpijad, navukova-praktyčnych kanfierencyj, tamu mnie heta dastatkova lohka dałosia.
Pry hetym student paśpiavaŭ navat syhrać u teatry fakulteta — «Bija-teatry». U pjesie «Sercu nie zahadaješ» jamu dastałasia rola pieršaha rebra čałaviečaha arhanizma.
Na ŭručeńni dypłomaŭ u Piekinie syna padtrymlivała maci Iryna Ściapanava.
Zhodna z danymi z adkrytych krynic, žančyna, vierahodna, pracuje ŭ MUS (prynamsi ŭ 2021 hodzie, nakolki viadoma «Našaj Nivie», jana pracavała ŭ departamiencie hramadzianstva i mihracyi MUS). Tak, jaje možna ŭbačyć na fota z aznajamlenčaj pajezdki supracoŭnikaŭ biełaruskaha ministerstva ŭ Tadžykistan, jakaja adbyłasia ŭ žniŭni 2024 hoda.
A ŭ lutym hetaha hoda Iryna trapiła na fota pasiadžeńnia ekśpiertaŭ krain SND. Jany razhladali pahadnieńnie ab supracoŭnictvie ŭ baraćbie sa złačynnaściu na transparcie.
Školnikam zrabiŭ dakład na kitajska-biełaruskaj kanfierencyi, i jaho adznačyli
Jaŭhien Žukoŭski ź Minska da pastupleńnia na bijafak BDU byŭ aktyŭnym studentam Nacyjanalnaha dziciačaha technaparka. Tak, u 2021 hodzie jašče školnikam jon pajechaŭ u Huančžou, dzie ŭdzielničaŭ u čaćviortym Kitajska-biełaruskim forumie. Jaho dakład «Ekałahičny sintez nanakampazitaŭ srebra i poliviniłavaha śpirtu» byŭ adznačany kalehijaj forumu. Kiraŭnikom pracy Žukoŭskaha byŭ doktar chimičnych navuk, prafiesar Dźmitryj Hrynšpan.
Z hetym ža dakładam Jaŭhien udzielničaŭ i ŭ IV Mižnarodnym studenckim ekałahičnym kanhresie, jaki sabraŭ bolš za 100 maładych ekołahaŭ ź Biełarusi, Rasii, Litvy, Turkmienistana i Banhładeš.
Užo budučy studentam, Jaŭhien atrymaŭ dypłom treciaj stupieni na alimpijadzie pa matematycy siarod studentaŭ fakultetaŭ niematematyčnaha profilu BDU. Darečy, jon taksama hraŭ u «Bija-teatry», jak i Ściapanaŭ. Tolki ŭžo čaćviertaje rabro.
Padčas uručeńnia dypłoma synu prysutničaŭ i jaho baćka Juryj Žukoŭski. Jon pracuje ŭ UP «STS-Biełpolipłastyk». Heta najbujniejšy ŭ Biełarusi pastaŭščyk trub.
Udzielničaŭ u IT-konkursach i nazvaŭ svoj šlach «ciarnistym»
Razam z Kolem Łukašenkam vučyŭsia i hamialčanin Jahor Karatkievič. Vypusknik siaredniaj škoły № 40, jašče ŭ školnyja hady jon aktyŭničaŭ u «Homielskim abłasnym centry techničnaj tvorčaści dziaciej i moładzi».
Chłopiec zajmaŭ pryzavyja miescy na roznych IT-konkursach. Naprykład, u 2019 hodzie ŭ jaho było pieršaje miesca ŭ katehoryi «Veb-dyzajn» respublikanskaha konkursu Hi-Tech. A ŭ 2021 hodzie — druhoje miesca ŭ abłasnym chakatonie «Inicyjatyvy, jakija palapšajuć žyćcio». Jon prapanavaŭ «pratatyp najpraściejšaj hulniavoj kansoli dla navučańnia asnovam prahramavańnia».
— «Ciarnistym» [byŭ šlach], — raskazvaŭ Jahor dziaržTB pra ciažkaści ŭ vučobie za hetyja hady. — U pryncypie, takoje pramacvańnie dla siabie novych tem, novych mahčymaściaŭ, heta značyć razumieńnie, jak adbyvajucca navukovyja pracesy, navukovyja ekśpierymienty ŭ realnaści, nakolki našy idei, ambicyi jak maładych vučonych realizujemyja, u tym liku i ŭ našaj krainie.
U Piekinie ź im prysutničaŭ i baćka chłopca Alaksandr Karatkievič. Pra jaho ničoha asablivaha nieviadoma.
Mužčyna znajšoŭsia tolki na fota sustrečy z Alaksiejem Tałajem u Biełaruskim dziaržaŭnym univiersitecie transpartu ŭ Homieli. Na sustrečy prysutničali supracoŭniki BiełDUT, Homielskaj mytni i «Biełmytservisa». Nie vyklučana, što hamialčanin pracuje ŭ adnym z hetych miescaŭ.
Nahadajem, 30 červienia dziaržSMI paviedamili, što Alaksandr Łukašenka prysutničaŭ na vypusknym małodšaha syna Mikałaja ŭ Piekinie — tam uručali dypłomy studentam pieršaj sumiesnaj biełaruska-kitajskaj prahramy pa śpiecyjalnaści «bijatechnałohija». Ź im u Piekinie vučylisia jašče čaćviora chłopcaŭ.
Kamientary