Яшчэ тры іранскія футбалісткі перадумалі прасіць прытулак у Аўстраліі
Іранскае інфармацыйнае агенцтва паведаміла, што яны «вяртаюцца ў цёплыя абдымкі сваіх сем'яў і на радзіму».
Яшчэ тры ўдзельніцы жаночай зборнай Ірана па футболе, якія прынялі бежанскія візы, каб застацца ў Аўстраліі, вырашылі вярнуцца на радзіму, піша ESPN.
Пасля іх ад'езду ў Аўстраліі застаюцца трое членаў каманды.
«Уначы тры ўдзельніцы іранскай жаночай зборнай па футболе прынялі рашэнне далучыцца да астатняй каманды ў іх падарожжы назад у Іран», — гаворыцца ў заяве міністра ўнутраных спраў Аўстраліі Тоні Бёрка.
«Пасля таго як гульцы паведамілі аўстралійскім афіцыйным асобам аб сваім рашэнні, ім неаднаразова давалі магчымасць абмеркаваць варыянты далейшых дзеянняў», — дадаў Бёрк.
Інцыдэнт з іранскай зборнай здарыўся ў Аўстраліі на жаночым Кубку Азіі пасля пачатку вайны на Блізкім Усходзе.
Пяць футбалістак адмовіліся спяваць нацыянальны гімн перад матчам з Паўднёвай Карэяй.
У Іране адзін з каментатараў матчу абвінаваціў каманду ў тым, што яны здрадніцы ваеннага часу, і запатрабаваў суровага пакарання.
Першапачаткова шэсць гульцоў і адзін член тэхнічнага персаналу са складу ў 26 чалавек прынялі гуманітарныя візы, каб застацца ў Аўстраліі. Астатняя частка каманды вылецела з Сіднея ў Малайзію 9 сакавіка.
Яшчэ адна футбалістка пазней перадумала і пакінула Аўстралію.
Цяпер яшчэ трое вылецелі з Сіднея ў Куала-Лумпур (Малайзія). Астатняя частка каманды застаецца ў Куала-Лумпуры з моманту ад'езду з Аўстраліі.
Іранскае інфармацыйнае агенцтва Tasnim паведаміла, што апошнімі трыма, хто пакінуў Аўстралію, былі два гульцы і член тэхнічнага персаналу. Гэтыя трое «вяртаюцца ў цёплыя абдымкі сваіх сем'яў і на радзіму», гаворыцца ў заяве.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»37
Каментары