Jašče try iranskija futbalistki pieradumali prasić prytułak u Aŭstralii
Iranskaje infarmacyjnaje ahienctva paviedamiła, što jany «viartajucca ŭ ciopłyja abdymki svaich siemjaŭ i na radzimu».
Jašče try ŭdzielnicy žanočaj zbornaj Irana pa futbole, jakija pryniali biežanskija vizy, kab zastacca ŭ Aŭstralii, vyrašyli viarnucca na radzimu, piša ESPN.
Paśla ich adjezdu ŭ Aŭstralii zastajucca troje členaŭ kamandy.
«Unačy try ŭdzielnicy iranskaj žanočaj zbornaj pa futbole pryniali rašeńnie dałučycca da astatniaj kamandy ŭ ich padarožžy nazad u Iran», — havorycca ŭ zajavie ministra ŭnutranych spraŭ Aŭstralii Toni Biorka.
«Paśla taho jak hulcy paviedamili aŭstralijskim aficyjnym asobam ab svaim rašeńni, im nieadnarazova davali mahčymaść abmierkavać varyjanty dalejšych dziejańniaŭ», — dadaŭ Biork.
Incydent ź iranskaj zbornaj zdaryŭsia ŭ Aŭstralii na žanočym Kubku Azii paśla pačatku vajny na Blizkim Uschodzie.
Piać futbalistak admovilisia śpiavać nacyjanalny himn pierad matčam z Paŭdniovaj Karejaj.
U Iranie adzin z kamientataraŭ matču abvinavaciŭ kamandu ŭ tym, što jany zdradnicy vajennaha času, i zapatrabavaŭ surovaha pakarańnia.
Pieršapačatkova šeść hulcoŭ i adzin člen techničnaha piersanału sa składu ŭ 26 čałaviek pryniali humanitarnyja vizy, kab zastacca ŭ Aŭstralii. Astatniaja častka kamandy vylecieła ź Sidnieja ŭ Małajziju 9 sakavika.
Jašče adna futbalistka paźniej pieradumała i pakinuła Aŭstraliju.
Ciapier jašče troje vylecieli ź Sidnieja ŭ Kuała-Łumpur (Małajzija). Astatniaja častka kamandy zastajecca ŭ Kuała-Łumpury z momantu adjezdu z Aŭstralii.
Iranskaje infarmacyjnaje ahienctva Tasnim paviedamiła, što apošnimi tryma, chto pakinuŭ Aŭstraliju, byli dva hulcy i člen techničnaha piersanału. Hetyja troje «viartajucca ŭ ciopłyja abdymki svaich siemjaŭ i na radzimu», havorycca ŭ zajavie.
Kamientary