Вікторыю Кульшу вызвалялі з гіпсам на шыі: «Пералом пазванкоў — гэта вынік фізічнага гвалту ў калоніі»
Вікторыя Кульша была вызвалена з іншымі палітвязнямі 13 снежня мінулага года з цяжкай траўмай — пераломам двух шыйных пазванкоў, які яна атрымала ў жаночай калоніі №24 (Зарэчча). Праз неабходнасць насіць гіпсавы гарсэт жанчына пазбягала фотакамер адразу пасля перасячэння мяжы, а на сам абмен яе дастаўлялі непасрэдна з медсанчасткі калоніі, куды яна трапіла пасля тэрміновай шпіталізацыі. Што з ёю здарылася, Вікторыю спытала «Новая газета Еўропа».
Калі аўтобусы са 109 пасажырамі-палітвязнямі перасеклі ўкраінскую мяжу, канчатковым пунктам стаў ваенны шпіталь у Чарнігаўскай вобласці. Вікторыя адразу папрасіла медыкаў зняць з яе гіпс, піша выданне.
Але ўкраінскія дактары адмовіліся: не маючы на руках вынікаў МРТ і КТ, яны не маглі ўзяць на сябе такую адказнасць. І тады Вікторыя папрасіла суседак па палаце дапамагчы ёй.
Нажніцамі ўсе разам па кавалачку яны змаглі разрэзаць, разламаць гіпсавы гарсэт.
Вікторыі проста не хацелася, каб яе бачылі ў такім стане.
Цяпер яна лечыцца ў Польшчы.
— Пералом пазванкоў — не вынік збіцця. Але гэта вынік фізічнага гвалту ў калоніі. Іншых падрабязнасцяў я пакуль расказаць не магу. Але калі вы хочаце ведаць, ці зазнавала я збіццё і фізічны гвалт на працягу ўсіх пяці з лішнім гадоў за кратамі, — так. І не адзін раз. І не толькі я.
Паводле яе слоў, б'юць не толькі палітвязняў і не толькі супрацоўнікі адміністрацыі. Самі асуджаныя таксама любяць распраўляцца з суседкамі па атрадзе.
— 68‑гадовую палітвязню Алену Гнаук супрацоўнікі не білі. Але яе білі жанчыны з атрада, — кажа яна.
Яе асуджаныя не чапалі. Але білі супрацоўнікі.
— Калі б я ўпала, то дабівалі б нагамі, — гаворыць яна.
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм13
Каментары