У панядзелак увечары высокапастаўлены прадстаўнік адміністрацыі прэзідэнта ЗША паведаміў карэспандэнту «Голасу Амерыкі» ў Белым доме аб прыпыненні вайсковай дапамогі Украіне.
ЗША прыпыняюць вайсковую дапамогу Украіне, пра гэта «Голасу Амерыкі» паведаміў высокапастаўлены прадстаўнік амерыканскай адміністрацыі.
«Прэзідэнт ясна даў зразумець, што ён засяроджаны на міры. Нам трэба, каб нашы партнёры таксама былі адданыя гэтай мэце. Мы прыпыняем і пераглядаем нашу дапамогу, каб пераканацца, што яна спрыяе рашэнню», — заявіў супрацоўнік адміністрацыі прэзідэнта ЗША.
Сам Трамп гэтую пастанову пакуль не каментаваў, афіцыйнай інфармацыі з Белага дома таксама не паступала. Адказваючы ў панядзелак на пытанне, ці не збіраецца ён прыпыніць вайсковую дапамогу Украіне, Трамп сказаў: «Паглядзім, што будзе далей».
Прэзідэнт ЗША Дональд Трамп кардынальна змяніў палітыку ЗША ў дачыненні да Украіны і Расіі пасля ўступлення на пасаду ў студзені, заняўшы больш прымірэнчую пазіцыю ў дачыненні да Масквы. Пастанова аб прыпыненні вайсковай дапамогі прынята пасля размовы на павышаных танах з прэзідэнтам Украіны Уладзімірам Зяленскім у Белым доме ў пятніцу, падчас якой Трамп раскрытыкаваў украінскага лідара за недастатковую ўдзячнасць Вашынгтону за падтрымку ў вайне з Расіяй.
У панядзелак Дональд Трамп зноў заявіў, што Зяленскі павінен праяўляць вялікую ўдзячнасць за амерыканскую дапамогу, а таксама адмоўна адрэагаваў на публікацыю Associated Press, у якой была прыведзеная цытата ўкраінскага лідара аб тым, што заканчэнне вайны «вельмі, вельмі далёка».
«Гэта найгоршая заява, якую мог зрабіць Зяленскі, і Амерыка больш не будзе гэта трываць!» — напісаў Трамп на сваёй платформе Truth Social.
Аднак у той жа самы дзень Трамп таксама намякнуў, што здзелка, якая адкрывае доступ да ўкраінскіх мінералаў для амерыканскіх інвестыцый, усё яшчэ можа быць заключаная.
Адміністрацыя Трампа пазіцыянуе пагадненне аб карысных выкапнях як спосаб для ЗША вярнуць сродкі, выдадзеныя Украіне ў выглядзе фінансавай і вайсковай дапамогі з моманту ўварвання Расіі тры гады таму.
Калі Дональда Трампа ў панядзелак спыталі ў Белым доме, ці вычарпаны патэнцыял для здзяйснення ўгоды, ён адказаў: »Не, не думаю».
Прэзідэнт паабяцаў даць абноўленую інфармацыю па гэтым пытанні ў аўторак вечарам, калі ён выступіць са зваротам да абедзвюх палат Кангрэса ЗША.
-
Прыхільны Трампу прэзідэнт Парагвая пайшоў у адстаўку пасля краху аднаго з мясцовых банкаў
-
У крымскім СІЗА загінула выкладчыца харкаўскай моўнай школы, якая прыехала да бацькоў
-
Прарасійскага актывіста з Латвіі, які ваяваў з бел-чырвона-белым сцягам, у Расіі прымусілі падпісаць вайсковы кантракт і адправілі на вайну
Цяпер чытаюць
Хто такая Алеся Пархоменка з Кіпра, якая развязала беларуска-беларускую вайну69
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары