U paniadziełak uviečary vysokapastaŭleny pradstaŭnik administracyi prezidenta ZŠA paviedamiŭ karespandentu «Hołasu Amieryki» ŭ Biełym domie ab prypynieńni vajskovaj dapamohi Ukrainie.
ZŠA prypyniajuć vajskovuju dapamohu Ukrainie, pra heta «Hołasu Amieryki» paviedamiŭ vysokapastaŭleny pradstaŭnik amierykanskaj administracyi.
«Prezident jasna daŭ zrazumieć, što jon zasiarodžany na miry. Nam treba, kab našy partniory taksama byli addanyja hetaj mecie. My prypyniajem i pierahladajem našu dapamohu, kab pierakanacca, što jana spryjaje rašeńniu», — zajaviŭ supracoŭnik administracyi prezidenta ZŠA.
Sam Tramp hetuju pastanovu pakul nie kamientavaŭ, aficyjnaj infarmacyi ź Biełaha doma taksama nie pastupała. Adkazvajučy ŭ paniadziełak na pytańnie, ci nie źbirajecca jon prypynić vajskovuju dapamohu Ukrainie, Tramp skazaŭ: «Pahladzim, što budzie dalej».
Prezident ZŠA Donald Tramp kardynalna źmianiŭ palityku ZŠA ŭ dačynieńni da Ukrainy i Rasii paśla ŭstupleńnia na pasadu ŭ studzieni, zaniaŭšy bolš prymirenčuju pazicyju ŭ dačynieńni da Maskvy. Pastanova ab prypynieńni vajskovaj dapamohi pryniata paśla razmovy na pavyšanych tanach z prezidentam Ukrainy Uładzimiram Zialenskim u Biełym domie ŭ piatnicu, padčas jakoj Tramp raskrytykavaŭ ukrainskaha lidara za niedastatkovuju ŭdziačnaść Vašynhtonu za padtrymku ŭ vajnie z Rasijaj.
U paniadziełak Donald Tramp znoŭ zajaviŭ, što Zialenski pavinien prajaŭlać vialikuju ŭdziačnaść za amierykanskuju dapamohu, a taksama admoŭna adreahavaŭ na publikacyju Associated Press, u jakoj była pryviedzienaja cytata ŭkrainskaha lidara ab tym, što zakančeńnie vajny «vielmi, vielmi daloka».
«Heta najhoršaja zajava, jakuju moh zrabić Zialenski, i Amieryka bolš nie budzie heta tryvać!» — napisaŭ Tramp na svajoj płatformie Truth Social.
Adnak u toj ža samy dzień Tramp taksama namiaknuŭ, što ździełka, jakaja adkryvaje dostup da ŭkrainskich minierałaŭ dla amierykanskich inviestycyj, usio jašče moža być zaklučanaja.
Administracyja Trampa pazicyjanuje pahadnieńnie ab karysnych vykapniach jak sposab dla ZŠA viarnuć srodki, vydadzienyja Ukrainie ŭ vyhladzie finansavaj i vajskovaj dapamohi z momantu ŭvarvańnia Rasii try hady tamu.
Kali Donalda Trampa ŭ paniadziełak spytali ŭ Biełym domie, ci vyčarpany patencyjał dla ździajśnieńnia ŭhody, jon adkazaŭ: »Nie, nie dumaju».
Prezident paabiacaŭ dać abnoŭlenuju infarmacyju pa hetym pytańni ŭ aŭtorak viečaram, kali jon vystupić sa zvarotam da abiedźviuch pałat Kanhresa ZŠA.
Ciapier čytajuć
Prapahandysty zapeŭnivajuć, što 196 palitviaźniaŭ užo na svabodzie9
Kamientary