Даліваеце ваду ў шампунь, калі ён заканчваецца? Хімік тлумачыць, чаму так рабіць не варта
Калі шампуню ў бутэльцы застаецца зусім мала, многія даліваюць туды вады, каб выкарыстаць рэшткі. Здаецца, што гэта добры спосаб зэканоміць. Аднак такая звычка можа мець непрыемныя наступствы.
Разбаўленне шампуню вадой змяняе яго склад і можа стварыць спрыяльныя ўмовы для размнажэння бактэрый і грыбкоў. Пра гэта папярэджвае інжынер-хімік Дыега Фернандэс, піша іспанскае выданне Ultima Hora.
Рэч у тым, што шампунь змяшчае розныя кампаненты ў строга вызначаных прапорцыях. Калі даліць вады, іх канцэнтрацыя зменшыцца, а значыць, сродак можа горш ачышчаць валасы і скуру галавы.
Але галоўная праблема нават не ў гэтым. У склад шампуняў уваходзяць кансерванты, якія перашкаджаюць размнажэнню мікраарганізмаў. Калі разбавіць сродак вадой, канцэнтрацыя гэтых рэчываў таксама знізіцца, а разам з ёй можа аслабнуць і абарона ад бактэрый і грыбкоў.
Да таго ж вада з-пад крана не стэрыльная. Разам з ёй у бутэльку могуць трапіць новыя мікраарганізмы. У выніку разбаўлены шампунь, асабліва калі ён доўга стаіць у вільготнай ваннай, можа стаць спрыяльным асяроддзем для іх размнажэння.
Пры гэтым хімік не заклікае выкідаць бутэльку, калі на дне яшчэ застаўся шампунь. Ён прапануе простае рашэнне. Можна даліць зусім крыху вады, каб змыць рэшткі са сценак, але атрыманую сумесь трэба выкарыстаць адразу, а не пакідаць на наступны раз.
Паводле спецыяліста, тое самае правіла тычыцца вадкага мыла для рук і іншых вадкіх сродкаў для мыцця. Іх таксама не варта разбаўляць вадой і захоўваць у такім выглядзе.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары