Лукашэнка значна павысіў мыты на шампуні з «краін англасаксонскай групы»
12 студзеня Аляксандр Лукашэнка падпісаў указ № 16 «Аб часовым устанаўленні ставак увазных мытных пошлін», паведамляе ягоная прэс-служба. Указ «скіраваны на абарону эканамічных інтарэсаў Беларусі і стварае ўмовы для замяшчэння адпаведнага імпарту таварамі, вырабленымі ў ЕАЭС».
Дакументам па 30 чэрвеня ўключна ўстаноўленыя павышаныя стаўкі ўвазных мытных пошлін (35% ад мытнага кошту) на шампуні, сродкі для валасоў і сродкі для чысткі зубоў, якія паходзяць з «краін англасаксонскай групы (ЗША, Вялікабрытанія, Канада, Аўстралія, Новая Зеландыя)».
У адзінай таварнай наменклатуры знешнеэканамічнай дзейнасці Еўразійскага эканамічнага саюза сродкі для чысткі зубоў і сродкі для валасоў адносяцца да 33-й групы тавараў, на якія распаўсюджваецца стаўка ўвазной мытнай пошліны (у працэнтах ад мытнага кошту або ў еўра, або ў доларах ЗША) — 6,5%.
Такім чынам, стаўкі пошліны павышаныя прыкладна ў 5,4 разу, адзначае «Позірк».
Каментары