«Бачылі нейкіх робатаў». Побач з базай ВПС у Англіі арыштавалі пяць чалавек — іх падазраюць у падрыхтоўцы тэракту

Пяць мужчын арыштаваныя па падазрэнні ў падрыхтоўцы тэрарыстычнага акта. Пра мэту і матывы зламыснікаў пакуль нічога не вядома, піша Бі-Бі-Сі.

Акрамя брытанскай ваеннай авіяцыі, на базе Фэйрфард пастаянна размяшчаюцца падраздзяленні ВПС ЗША, а пасля пачатку вайны з Іранам там былі разгорнутыя амерыканскія бамбардзіроўшчыкі. 

У ноч на нядзелю 27 верасня ў паліцыю паступіў званок пра «тры падазроныя аўтамабілі», якія накіроўваліся ў бок авіябазы Фэйрфард. Мясцовы жыхар Джуліян Тадсберы, расказаў, што ўначы ў гэтым раёне з'явіліся тры «незвычайныя фургоны». Ён сцвярджае, што на запісах з камер відэаназірання на ганках дамоў, якія жыхары прагледзелі дыстанцыйна ўжо пасля эвакуацыі, можна было разгледзець «нейкіх робатаў, якія зазіралі ў кузавы гэтых фургонаў».

З раніцы вайсковыя сапёры з выкарыстаннем спецыяльнага робата абследавалі некалькі аўтамабіляў, а з вёскі Уэлфард побач з авіябазай раніцай былі эвакуяваныя дзясяткі сем'яў. Паліцыя ўстанавіла ачапленне, на месца здарэння прыбыла вялікая колькасць машын аператыўных службаў.

Паліцыя Глостэршыра паведаміла пра арышт некалькіх мужчын па падазрэнні ў злачынстве з выбуховымі рэчывамі. Пазней контртэрарыстычная паліцыя ўдакладніла, што пяцёра арыштаваных падазраюцца таксама ў падрыхтоўцы тэрарыстычнага акта.

Паводле звестак паліцыі, былі эвакуяваныя жыхары 85 дамоў. Кардон, устаноўлены з ранняй раніцы нядзелі, быў пашыраны да 400 метраў і цяпер ахоплівае авіябазу RAF Фэйрфард.

Паліцыя і контртэрарыстычныя службы пакуль не агалошваюць ніякіх дэталяў, якія дазваляюць зразумець, з якімі менавіта падзеямі маглі быць звязаныя дзеянні падазраваных і хто мог стаяць за арганізацыяй меркаванага тэракту. Прэм'ер-міністр Вялікабрытаніі Эндзі Бернэм заклікаў не рабіць паспешлівых здагадак і дачакацца вынікаў расследавання.

Прэзідэнт ЗША Дональд Трамп пахваліў брытанскія ўлады за зладжаную працу і заявіў, што за падазраванымі сачылі даўно.

«Мы вялі за імі сачэнне. Яны мелі намер нанесці сур'ёзную шкоду нашай крэпасці, і супрацоўніцтва з брытанцамі склалася выдатна. Магчыма, гэта быў Скотланд-Ярд, я не ведаю. Мы супрацоўнічалі з многімі [спецслужбамі]. Мы даўно сачылі за імі і злавілі іх», — сказаў Трамп.

Вядома, што авіябаза выкарыстоўвалася ВПС ЗША для размяшчэння бамбардзіроўшчыкаў, якія задзейнічаныя ў вайне з Іранам, што ідзе ўжо сёмы месяц.

Улады Ірана ў ліпені абвінавацілі Вялікабрытанію ў саўдзеле ў ваенных злачынствах і выступілі з недвухсэнсоўным папярэджаннем: «Любы бок, які якім-небудзь чынам удзельнічае ў ваеннай агрэсіі супраць Ірана, будзе несці адказнасць за наступствы гэтага рашэння». База ВПС у Фэйрфардзе была згаданая ў заяве КСІР.

Акрамя таго, усё гэта адбылося на фоне росту колькасці інцыдэнтаў, якія заходнія ўлады звязваюць з гібрыднай вайной Расіі супраць Захаду. Паводле звестак заходніх крыніц, мэта кампаніі, за якой бачаць Крэмль, а дакладней яго ваенную разведку ГРУ, — пакараць краіны, якія падтрымліваюць Украіну.

• 2
• 0
• 0
• 0
• 0
• 0
• 0
• 0