У Ізраілі завяршылі расследаванне смерці Яніны родам з Беларусі
Ізраільская паліцыя завяршыла расследаванне забойства 30‑гадовай ураджэнкі Беларусі Яніны Масвады (Русінавай). У забойстве падазраюць яе 28‑гадовага мужа Алі Масваду. Яму плануюць выставіць абвінавачанне ў чацвер у акруговым судзе Хайфы, піша Reform.news.
У ноч на 25 верасня Яніну знайшлі ў кватэры ў Хайфе з цяжкім раненнем шыі. Медыкі спрабавалі яе рэанімаваць, але пазней жанчына памерла ў бальніцы. У суседнім пакоі ў гэты час знаходзіўся двухмесячны сын сужэнцаў. Пасля трагедыі дзіця перадалі пад апеку сацыяльных службаў.
Паводле версіі следства, прычынай забойства стала рашэнне жанчыны расстацца з мужам і з'ехаць з іх агульнага дома. Яна збіралася вярнуцца з дзіцем у Беларусь. Муж баяўся, што жонка пасля гэтага не вернецца ў Ізраіль.
Алі Масвада з самага пачатку адмаўляў датычнасць да смерці жонкі. Ён сцвярджаў, што жанчына сама нанесла сабе раненні, а ён спрабаваў спыніць крывацёк і выратаваць яе. Аднак, па словах паліцыі, сабраныя доказы абвяргаюць гэтую версію. У прыватнасці, вынікі судова-медыцынскай экспертызы выключаюць магчымасць таго, што загінулая сама нанесла сабе смяротныя пашкоджанні.
Следчыя таксама вывучылі паказанні знаёмых Яніны і ранейшыя скаргі на гвалт і пагрозы з боку мужа. Паводле іх звестак, жанчына баялася мужчыны, бо ён пагражаў прычыніць ёй шкоду і адабраць дзіця.
На месцы злачынства знайшлі нож, якім, верагодна, было здзейснена забойства. Паліцыя лічыць, што пасля здарэння мужчына спрабаваў знішчыць доказы і стварыць бачнасць самагубства. Следчыя праверылі таксама відэазапісы, на якія спасылаліся сваякі падазраванага, сцвярджаючы, што Яніна нібыта пагражала скончыць жыццё самагубствам. Гэтыя сцвярджэнні не пацвердзіліся.
Ізраільская актывістка Лілі Бэн-Амі паведаміла, што маці загінулай Яніны зможа атрымаць рэкамендацыю сацыяльных службаў на апеку над унукам.
Паводле яе слоў, паліцыя ўжо завяршыла расследаванне і перадала матэрыялы пракурору. Пасля выстаўлення абвінавачання Алі Масвада таксама страціць права на апеку над дзіцем.
Маленькага сына забітай у Ізраілі беларускі хоча забраць сям’я Алі, падазраванага ў забойстве. Дзед ідзе ў шарыяцкі суд
Цела забітай у Ізраілі 31‑гадовай Яніны пахавалі ў Беларусі. Яе маці спрабуе забраць маленькага ўнука
Маці забітай у Ізраілі Яніны: Яе муж Алі тэлефанаваў мне ў Гомель, абражаў дачку і адчайна яе раўнаваў
У Хайфе забілі 31‑гадовую беларуску Яніну. У яе застаўся двухмесячны сын
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна10
Каментары