Вольга Лойка: Я не вельмі веру ў перспектывы міністра Маркава дастаць паўнамоцтвы з-пад ААЦ
У аналітычным выпуску ТОК эканамічная аглядальніца Вольга Лойка выказала свой пункт гледжання на міністра інфармацыі Марата Маркава.
На погляд Вольгі Лойка, Марат Маркаў адносіцца да тых людзей, якія пасля 2025 года паспрабуюць павялічыць свой уплыў. І гэтаму спрыяюць абставіны — рашэнне аб узмацненні паўнамоцтваў чыноўнікаў, у прыватнасці, старшынь райвыканкамаў, агучанае падчас нарады ў Лукашэнкі.
«Ёсць адчуванне, што нейкая частка ўлады цяпер не тое што раздаецца ці аказалася без дагляду, але яна з'явілася. Пасля той нарады выйшлі старшыні райвыканкамаў і расказвалі БелТА аб тым, што сітуацыя мяняецца, настроі мяняюцца, што такая цэнтралізацыя ўлады ўжо не патрэбна. Відавочна, далі такую ўводную. Частка ўлады будзе пераразмяркоўвацца», — заўважае аналітык.
«Маркаў, мне здаецца, адзін з тых, хто будзе прэтэндаваць. Ён ужо абазначыў гэтую амбіцыю, што нешта ў Беларусі няма [органа кшталту] Раскамнагляду — вельмі ўплывовага органа, які вызначае інфармацыйны парадак, які не толькі рубільнік у руках трымае, можа і забараніць, і адкрыць», — дадае яна.
Лойка звяртае ўвагу, што ў Беларусі падобныя функцыі размеркаваныя паміж некалькімі органамі — двума міністэрствамі, сувязі і інфармацыі, а таксама такой закрытай структурай як Аператыўна-аналітычны цэнтр (ААЦ).
«Наколькі рэальна з-пад ААЦ зараз дастаць нейкія паўнамоцтвы на карысць Белкамнагляду, я не ведаю. Я не вельмі веру ў перспектывы Маркава», — даводзіць Лойка.
Як тлумачыць аналітык, яе скептыцызм заснаваны на тым, што Маркаў, маючы вялікія рэсурсы, не можа нават забяспечыць больш-менш прыстойную лічбу праглядаў сваёй перадачы на АНТ пры даступнасці любых спікераў.
«Тут табе даступна ўсё, у цябе любыя рэсурсы, у цябе рэсёрчары (расследавальнікі. — НН), а на выхадзе прадукт, які не вельмі. Таму «Раскамнагляд» іх не выратуе. Дадатковы функцыянал ён можа перацягнуць на сябе. Ці будзе гэты Белкамнагляд эфектыўнейшы, чым ААЦ, я сумняюся. Я сумняюся якраз таму, што лава кароткая, што няма там людзей, якія могуць зрабіць нешта такое па-за межамі нейкага простага функцыяналу», — тлумачыць Лойка.
На заўвагу Насты Роўды аб тым, што Маркаў уваходзіць у элітарны клуб уладальнікаў матацыкла Harley-Davidson і быў заўважаны побач з Віктарам Лукашэнкам, Лойка адказала:
«Ведаеш, нават «Харлей Дэвідсан» ратуе не ўсіх. Я вось Шуневіча згадваю, ён таксама, па-мойму, з матацыклістаў. І хто ён цяпер? Паляўнічы і рыбалоў ганаровы».
Трамп заявіў, што ідуць перамовы пра вызваленне яшчэ 50 беларускіх палітвязняў, і назваў іх «закладнікамі»44
Трамп заявіў, што ідуць перамовы пра вызваленне яшчэ 50 беларускіх палітвязняў, і назваў іх «закладнікамі»
«Як Вольскі прыходзіў з ператрусам да Коласа, а Крапіва і Глебка даносілі на калег». Апублікаваныя жахлівыя ўспаміны Рыгора Бярозкіна пра рэпрэсіі 1920—1940-х1515
Каментары