Volha Łojka: Ja nie vielmi vieru ŭ pierśpiektyvy ministra Markava dastać paŭnamoctvy z-pad AAC
U analityčnym vypusku TOK ekanamičnaja ahladalnica Volha Łojka vykazała svoj punkt hledžańnia na ministra infarmacyi Marata Markava.
Na pohlad Volhi Łojka, Marat Markaŭ adnosicca da tych ludziej, jakija paśla 2025 hoda pasprabujuć pavialičyć svoj upłyŭ. I hetamu spryjajuć abstaviny — rašeńnie ab uzmacnieńni paŭnamoctvaŭ čynoŭnikaŭ, u pryvatnaści, staršyń rajvykankamaŭ, ahučanaje padčas narady ŭ Łukašenki.
«Jość adčuvańnie, što niejkaja častka ŭłady ciapier nie toje što razdajecca ci akazałasia biez dahladu, ale jana źjaviłasia. Paśla toj narady vyjšli staršyni rajvykankamaŭ i raskazvali BiełTA ab tym, što situacyja mianiajecca, nastroi mianiajucca, što takaja centralizacyja ŭłady ŭžo nie patrebna. Vidavočna, dali takuju ŭvodnuju. Častka ŭłady budzie pieraraźmiarkoŭvacca», — zaŭvažaje analityk.
«Markaŭ, mnie zdajecca, adzin z tych, chto budzie pretendavać. Jon užo abaznačyŭ hetuju ambicyju, što niešta ŭ Biełarusi niama [orhana kštałtu] Raskamnahladu — vielmi ŭpłyvovaha orhana, jaki vyznačaje infarmacyjny paradak, jaki nie tolki rubilnik u rukach trymaje, moža i zabaranić, i adkryć», — dadaje jana.
Łojka źviartaje ŭvahu, što ŭ Biełarusi padobnyja funkcyi raźmierkavanyja pamiž niekalkimi orhanami — dvuma ministerstvami, suviazi i infarmacyi, a taksama takoj zakrytaj strukturaj jak Apieratyŭna-analityčny centr (AAC).
«Nakolki realna z-pad AAC zaraz dastać niejkija paŭnamoctvy na karyść Biełkamnahladu, ja nie viedaju. Ja nie vielmi vieru ŭ pierśpiektyvy Markava», — davodzić Łojka.
Jak tłumačyć analityk, jaje skieptycyzm zasnavany na tym, što Markaŭ, majučy vialikija resursy, nie moža navat zabiaśpiečyć bolš-mienš prystojnuju ličbu prahladaŭ svajoj pieradačy na ANT pry dastupnaści lubych śpikieraŭ.
«Tut tabie dastupna ŭsio, u ciabie lubyja resursy, u ciabie resiorčary (rasśledavalniki. — NN), a na vychadzie pradukt, jaki nie vielmi. Tamu «Raskamnahlad» ich nie vyratuje. Dadatkovy funkcyjanał jon moža pieraciahnuć na siabie. Ci budzie hety Biełkamnahlad efiektyŭniejšy, čym AAC, ja sumniajusia. Ja sumniajusia jakraz tamu, što łava karotkaja, što niama tam ludziej, jakija mohuć zrabić niešta takoje pa-za miežami niejkaha prostaha funkcyjanału», — tłumačyć Łojka.
Na zaŭvahu Nasty Roŭdy ab tym, što Markaŭ uvachodzić u elitarny kłub uładalnikaŭ matacykła Harley-Davidson i byŭ zaŭvažany pobač z Viktaram Łukašenkam, Łojka adkazała:
«Viedaješ, navat «Charlej Devidsan» ratuje nie ŭsich. Ja voś Šunieviča zhadvaju, jon taksama, pa-mojmu, z matacyklistaŭ. I chto jon ciapier? Palaŭničy i rybałoŭ hanarovy».
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie11
Kamientary