«Ты памёр?» Дзіўны кітайскі мабільны дадатак нечакана стаў вірусным
Дадатак, што патрабуе ад карыстальніка раз на два дні выходзіць на сувязь, нечакана ўзначаліў рэйтынгі платных загрузак у Кітаі, адлюстроўваючы глыбокія сацыяльныя змены ў сучасным кітайскім грамадстве.
Як піша BBC, ідэя дадатку з наўмысна змрочнай назвай «Are You Dead?» («Ты памёр?») гранічна простая: карыстальнік павінен раз на два дні націскаць на вялікую кнопку, каб пацвердзіць, што ён жывы. Калі кнопка не будзе націснутая своечасова, сістэма аўтаматычна звяжацца з даверанай асобай, пазначанай як экстранны кантакт, і паведаміць, што ўладальнік тэлефона можа быць у бядзе.
Дадатак, запушчаны ў маі мінулага года без асаблівай рэкламы, доўгі час заставаўся незаўважаным, пакуль у апошнія тыдні на яго не звярнула ўвагу моладзь, якая жыве ў мегаполісах. У выніку ён стаў лідарам па колькасці загрузак сярод платных дадаткаў.
Чаму такі поспех?
Як адзначаюць эксперты, такі поспех не дзіўны. Паводле прагнозаў дзяржаўнага выдання Global Times, да 2030 года ў Кітаі будзе налічвацца каля 200 мільёнаў індвідуальных хатніх гаспадарак.
І менавіта на гэтых людзей арыентуецца дадатак, які апісвае сябе як «бяспечны спадарожнік-кампаньён… незалежна ад таго, ці вы офісны работнік, які жыве адзін, ці студэнт удалечыні ад дому, ці любы чалавек, які абраў адзінокі лад жыцця».
Адзін з карыстальнікаў у сацыяльных сетках патлумачыў феномен так:
«Існуе страх, што людзі, якія жывуць у адзіноце, могуць памерці незаўважанымі, і не будзе каму паклікаць на дапамогу. Я часам задумваюся: калі б я памёр адзін, хто б забраў маё цела?».
Назва дадатку «Si-le-ma» — гэта гульня слоў, якая сугучная з назвай папулярнага ў Кітаі сэрвісу дастаўкі ежы «E-le-ma» (што азначае «Ці ты паеў?»). Некаторыя крытыкі лічаць назву занадта злавеснай і заклікаюць змяніць яе на нешта больш пазітыўнае, напрыклад, «Ты ў парадку?» або «Як ты?». Распрацоўшчыкі з кампаніі Moonscape Technologies заявілі, што разглядаюць магчымасць рэбрэндынгу.
Цікава, што на міжнародным рынку праграма вядомая пад іншай назвай — Demumu. Там яна таксама паказвае моцныя пазіцыі: уваходзіць у топ-2 сярод платных утылітарных праграм у ЗША, Сінгапуры і Ганконгу, і ў топ-4 у Аўстраліі і Іспаніі — магчыма, дзякуючы кітайцам, якія жывуць за мяжой.
Спачатку запушчаны як бясплатны, дадатак цяпер перайшоў у катэгорыю платных — хоць і па нізкай цане 8 юаняў ($1,15).
Хто распрацоўшчык?
Пра заснавальнікаў вядома няшмат. Кажуць, што яны — трое людзей, якія нарадзіліся пасля 1995 года і невялікай камандай стварылі дадатак у Чжэнчжоў, правінцыя Хэнань. Паводле іх слоў, распрацоўка каштавала ўсяго каля $140 даляраў, але цяпер яны шукаюць інвестыцыі ў памеры $140 тысяч за 10% долі кампаніі.
Распрацоўшчыкі хочуць пашыраць аўдыторыю і ўжо абмяркоўваюць асобны прадукт, арыентаваны на пажылых людзей. У краіне, дзе больш за пятую частку насельніцтва складаюць людзі, старэйшыя за 60 гадоў, праблема «адзінокай смерці» становіцца ўсё больш актуальнай.
Нядаўна каманда апублікавала зварот, у якім заклікала грамадства больш увагі надаваць старэйшым людзям, падкрэсліваючы, што тыя «заслугоўваюць, каб іх бачылі, паважалі і абаранялі».
Пажылым карэйцам купляюць «робатаў-унукаў» — каб дапамагчы справіцца з адзінотай
Праз 70 гадоў насельніцтва Кітая можа скараціцца ўдвая. Як палітыка аднаго дзіцяці траўмавала мільёны жанчын
«Праз пакаленне ў Афрыцы будзе нараджацца палова ўсіх дзяцей свету». Чаму Паўднёвая Карэя вымірае і чым цікавы прыклад Ізраіля
Цяпер чытаюць
«Надзея Сцяпанаўна». Мікіта Найдзёнаў апублікаваў паэму, якая нарадзілася ў Жодзінскай турме. Такога паэтычнага эпасу ў беларускай паэзіі ХХІ стагоддзя яшчэ не было66
Каментары