«Ty pamior?» Dziŭny kitajski mabilny dadatak niečakana staŭ virusnym
Dadatak, što patrabuje ad karystalnika raz na dva dni vychodzić na suviaź, niečakana ŭznačaliŭ rejtynhi płatnych zahruzak u Kitai, adlustroŭvajučy hłybokija sacyjalnyja źmieny ŭ sučasnym kitajskim hramadstvie.
Jak piša BBC, ideja dadatku z naŭmysna zmročnaj nazvaj «Are You Dead?» («Ty pamior?») hranična prostaja: karystalnik pavinien raz na dva dni naciskać na vialikuju knopku, kab paćvierdzić, što jon žyvy. Kali knopka nie budzie nacisnutaja svoječasova, sistema aŭtamatyčna źviažacca z davieranaj asobaj, paznačanaj jak ekstranny kantakt, i paviedamić, što ŭładalnik telefona moža być u biadzie.
Dadatak, zapuščany ŭ mai minułaha hoda biez asablivaj rekłamy, doŭhi čas zastavaŭsia niezaŭvažanym, pakul u apošnija tydni na jaho nie źviarnuła ŭvahu moładź, jakaja žyvie ŭ miehapolisach. U vyniku jon staŭ lidaram pa kolkaści zahruzak siarod płatnych dadatkaŭ.
Čamu taki pośpiech?
Jak adznačajuć ekśpierty, taki pośpiech nie dziŭny. Pavodle prahnozaŭ dziaržaŭnaha vydańnia Global Times, da 2030 hoda ŭ Kitai budzie naličvacca kala 200 miljonaŭ indvidualnych chatnich haspadarak.
I mienavita na hetych ludziej aryjentujecca dadatak, jaki apisvaje siabie jak «biaśpiečny spadarožnik-kampańjon… niezaležna ad taho, ci vy ofisny rabotnik, jaki žyvie adzin, ci student udalečyni ad domu, ci luby čałaviek, jaki abraŭ adzinoki ład žyćcia».
Adzin z karystalnikaŭ u sacyjalnych sietkach patłumačyŭ fienomien tak:
«Isnuje strach, što ludzi, jakija žyvuć u adzinocie, mohuć pamierci niezaŭvažanymi, i nie budzie kamu paklikać na dapamohu. Ja časam zadumvajusia: kali b ja pamior adzin, chto b zabraŭ majo cieła?».
Nazva dadatku «Si-le-ma» — heta hulnia słoŭ, jakaja suhučnaja z nazvaj papularnaha ŭ Kitai servisu dastaŭki ježy «E-le-ma» (što aznačaje «Ci ty pajeŭ?»). Niekatoryja krytyki ličać nazvu zanadta złaviesnaj i zaklikajuć źmianić jaje na niešta bolš pazityŭnaje, naprykład, «Ty ŭ paradku?» abo «Jak ty?». Raspracoŭščyki z kampanii Moonscape Technologies zajavili, što razhladajuć mahčymaść rebrendynhu.
Cikava, što na mižnarodnym rynku prahrama viadomaja pad inšaj nazvaj — Demumu. Tam jana taksama pakazvaje mocnyja pazicyi: uvachodzić u top-2 siarod płatnych utylitarnych prahram u ZŠA, Sinhapury i Hankonhu, i ŭ top-4 u Aŭstralii i Ispanii — mahčyma, dziakujučy kitajcam, jakija žyvuć za miažoj.
Spačatku zapuščany jak biaspłatny, dadatak ciapier pierajšoŭ u katehoryju płatnych — choć i pa nizkaj canie 8 juaniaŭ ($1,15).
Chto raspracoŭščyk?
Pra zasnavalnikaŭ viadoma niašmat. Kažuć, što jany — troje ludziej, jakija naradzilisia paśla 1995 hoda i nievialikaj kamandaj stvaryli dadatak u Čženčžoŭ, pravincyja Chenań. Pavodle ich słoŭ, raspracoŭka kaštavała ŭsiaho kala $140 dalaraŭ, ale ciapier jany šukajuć inviestycyi ŭ pamiery $140 tysiač za 10% doli kampanii.
Raspracoŭščyki chočuć pašyrać aŭdytoryju i ŭžo abmiarkoŭvajuć asobny pradukt, aryjentavany na pažyłych ludziej. U krainie, dzie bolš za piatuju častku nasielnictva składajuć ludzi, starejšyja za 60 hadoŭ, prablema «adzinokaj śmierci» stanovicca ŭsio bolš aktualnaj.
Niadaŭna kamanda apublikavała zvarot, u jakim zaklikała hramadstva bolš uvahi nadavać starejšym ludziam, padkreślivajučy, što tyja «zasłuhoŭvajuć, kab ich bačyli, pavažali i abaraniali».
Pažyłym karejcam kuplajuć «robataŭ-unukaŭ» — kab dapamahčy spravicca z adzinotaj
Praz 70 hadoŭ nasielnictva Kitaja moža skaracicca ŭdvaja. Jak palityka adnaho dziciaci traŭmavała miljony žančyn
«Praz pakaleńnie ŭ Afrycy budzie naradžacca pałova ŭsich dziaciej śvietu». Čamu Paŭdniovaja Kareja vymiraje i čym cikavy prykład Izraila
Kamientary