Bialacki zajaviŭ, što jaho vyzvalili dziakujučy sankcyjam Zachadu suprać Łukašenki, i zaklikaŭ nie źmiakčać ich
Łaŭreat Nobieleŭskaj premii nazvaŭ Łukašenku «razburalnikam biełaruskaj nacyjanalnaj identyčnaści i biełaruskaj nacyjanalnaj śviadomaści».
Brytanskaja hazieta The Times apublikavała intervju z Alesiem Bialackim. Radyjo Svaboda pierakazvaje asnoŭnyja tezisy intervju.
«Łaŭreat Nobieleŭskaj premii miru i były palityčny źniavoleny ŭ Biełarusi papiaredziŭ pra niebiaśpieku źmiakčeńnia sankcyj suprać aŭtarytarnaha režymu Alaksandra Łukašenki», — piša The Times.
Hazieta nahadvaje, što ZŠA pastupova źmiakčali svaje handlovyja abmiežavańni dla Biełarusi, jakuju kaliści nazyvali «apošniaj dyktaturaj Jeŭropy», padčas pieramovaŭ, što spryjali vyzvaleńniu Alesia Bialackaha razam ź dziasiatkami inšych palityčnych źniavolenych.
Adnak samy viadomy pravaabaronca krainy pierakanany, što Vialikabrytanija i astatniaja častka Jeŭropy nie pavinny rabić toje samaje.
«Biez palityčnych i ekanamičnych sankcyj my zastalisia b u turmie, — skazaŭ Bialacki, tłumačačy, što hetyja miery dajuć ryčahi ŭpłyvu, nieabchodnyja dla pieramovaŭ ab vyzvaleńni źniavolenych.
— Tolki rezkaje paharšeńnie ekanamičnaha stanovišča Biełarusi ŭ apošnija miesiacy prymusiła ŭłady šukać vyjście. U režymu niama palityčnych apanientaŭ, niama demakratyčnych žurnalistaŭ. Jon zadušyŭ kulturnyja i moładzievyja inicyjatyvy».
Bialacki apisvaje ŭmovy, padobnyja da savieckaha HUŁAHa, u jakich znachodziacca palityčnyja viaźni.
«Vy možacie pamierci tam — jany prosta nie akažuć vam miedycynskuju dapamohu, — skazaŭ jon. — Kali vy vyžyvajecie, heta aznačaje, što vam pašancavała».
Žonka Bialackaha pisała jamu kožny tydzień, ale jon atrymaŭ tolki niekalki jaje listoŭ, a turemnyja achoŭniki nikoli nie pierasyłali joj jaho adkazaŭ. Pry vyzvaleńni Bialackaha ŭsie jaho dakumienty kanfiskavali, u tym liku dva rukapisy knih, jakija jon napisaŭ u źniavoleńni. Jak i mnohija inšyja biełaruskija palityčnyja viaźni, jon aściarožna vykazvajecca pra svaje pakuty, ale paviedamiŭ, što jamu admaŭlali ŭ lačeńni dva hady paśla taho, jak u jaho źjavilisia prablemy z nahami.
«Jany hladzieli, čym heta skončycca», — skazaŭ jon.
Sadavina i harodnina byli takoj redkaściu, što za ŭvieś 2025 hod adzinym śviežym płodam, jaki źjeŭ Bialacki, byŭ adzin jabłyk.
Siarod inšaha, Bialacki adkazaŭ, jak mohuć adbycca źmieny ŭ Biełarusi.
«Niachaj heta budzie jak u Ispanii paśla śmierci Fransiska Franka ci jak u Čechasłavakii padčas «Aksamitnaj revalucyi» — jość šmat roznych varyjantaŭ, — skazaŭ Bialacki. — Ale ja pierakanany, što ŭ Biełarusi hetyja źmieny niepaźbiežnyja, bo siońnia hetaja chunta, jakaja trymaje ŭładu, nie maje padtrymki naroda».
Bialacki taksama zajaviŭ, što Łukašenka byŭ «razburalnikam biełaruskaj nacyjanalnaj identyčnaści i biełaruskaj nacyjanalnaj śviadomaści», i paśladoŭna rujnuje admietnaść svajoj krainy ŭ praciah dvuchviekavoj palityki rusifikacyi, kančatkovaj metaj jakoj źjaŭlajecca abjadnańnie dźviuch dziaržaŭ.
Zahinuŭ biełaruski dobraachvotnik Vasil «Dzir» Rapicki10
Kamientary
zusim nie ździŭleny, našy EZ ružovyja levaki poni, zrazumieli što ich stratehija pracuje tolki na impieryju . Zaraz buduć zabrudžvać viadomych Biełarusaŭ, kab kazać potym - heta nie my heta Biełarusy patrabavali kryminalnaj abłohi RB. Nie atrymajecca maskvacentryčnyja levaki, vy ŭ historyi jak chaŭruśniki Maskoŭskaha impieryjalizmu
-EZ