Žycharku rasijskaha Taljaci prysudzili da 14 hadoŭ. Razmovy ź joj pra Ukrainu znajomy na spatkańniach zapisaŭ na dyktafon i adnios u FSB

Jaje sudzili adrazu pa šaści artykułach KK RF, u tym liku ab padrychtoŭcy da dziaržaŭnaj zdrady, zaklikach da teraryzmu, finansavańni teraryzmu i «vajennych fejkach». Prakuratura zaprašvała dla 27‑hadovaj Jeŭtušenka, jakaja adna vychoŭvaje siamihadovuju dačku, 18 hadoŭ kałonii.

«Ja nikoli nie ździajśniała nijakaj dziaržaŭnaj zdrady. Ja lublu svaju radzimu — Rasiju, i nikoli nie zrablu ničoha takoha, što b joj naškodziła. Kali ja i zrabiła niejkija pamyłki ci parušeńni, to znachodžańnie mianie ŭ miescach źniavoleńnia na praciahu amal troch hadoŭ — heta ŭžo bolš čym dastatkovaje pakarańnie. Prašu vas vynieści spraviadlivaje rašeńnie i adpuścić mianie da majoj dački», — skazała Jeŭtušenka ŭ apošnim słovie ŭ sudzie

U asnovu kryminalnaj spravy lahli antyvajennyja dopisy ŭ sacsietkach i pakazańni Mikałaja Kamarova, jakoha ŚMI nazyvali pravakataram.

Padčas družalubnych spatkańniaŭ jon zapisvaŭ na dyktafon ich razmovy, a paśla adnios zapisy ŭ FSB.

Jeŭtušenka zatrymali letam 2023 hoda na vychadzie ź dziciačaha sadka, kudy jana advodziła svaju piacihadovuju dačku. «Abiarnuŭšysia, ja ŭbačyła, što nada mnoj staić bolš za 10 mužčyn u cyvilnym adzieńni. Mnie nadzieli płastykavuju ściažku na ruki i kinuli ŭ mašynu tak, niby ja miech z bulbaj», — raspaviadała jana ŭ liście, apublikavanym «Choładam».

Žycharka Taljaci była aryštavanaja pa rašeńni suda ŭ lipieni 2023 hoda. Jaje zapadozryli ŭ tym, što jana «schilała žychara Samary da ździajśnieńnia dziaržaŭnaj zdrady ŭ formie pierachodu na bok praciŭnika, a mienavita da ŭstupleńnia va ŭzbrojenaje farmiravańnie — lehijon «Svaboda Rasii»», jaki ŭ Rasii abjaŭleny terarystyčnaj arhanizacyjaj i zabaronieny.

Paźniej u spravie źjaviłasia jašče piać artykułaŭ: ab zaklikach da teraryzmu, ab zaklikach da ekstremizmu ŭ internecie, ab finansavańni teraryzmu, ab «vajennych fejkach» i ab «reabilitacyi nacyzmu».

U ahulnaj składanaści pa vystaŭlenych abvinavačvańniach Jeŭtušenka pahražała da 22,5 hadoŭ kałonii. Vinu jana nie pryznała. Z sakavika 2024 hoda spravu razhladaŭ Centralny akruhovy vajenny sud, jaki znachodzicca ŭ Jekaciarynburhu, pasiadžeńni prachodzili ŭ Samary.

Pavodle źviestak «Choładu», sprava budavałasia na pakazańniach 36‑hadovaha Kamarova, ź jakim jana paznajomiłasia ŭ sacsietkach za paŭhoda da zatrymańnia.

«Ja chadziła na družalubnyja spatkańni, a potym akazałasia, što hety čałaviek zapisvaŭ našy razmovy na dyktafon z samoj pieršaj sustrečy. Jon zadavaŭ mnie kuču pytańniaŭ pra ich [lehijon «Svaboda Rasii»], a ja jamu adkazvała. Zapisy abrezanyja. Momanty, jakija mahli b apraŭdać mianie — vyklučany, i heta čutna, bo razmovy prosta abryvajucca», — pisała Jeŭtušenka ŭ liście karespandentu «Choładu».

Pavodle infarmacyi vydańnia, Kamaroŭ byŭ vałancioram samarskaha štaba Alaksieja Navalnaha, a potym zapisvaŭ krytyčnyja roliki ab pracy apazicyjanieraŭ.

U mužčyny jość niekalki sudzimaściaŭ pa spravach ab kradziažy, havaryłasia ŭ publikacyi «Choładu». Pavodle źviestak «Pieršaha adździeła», na pasiadžeńni suda Kamaroŭ paćvierdziŭ, što ŭ jaho jość sudzimaść.

Jeŭtušenka z samaha pačatku rasijskaha ŭvarvańnia va Ukrainu zajmała antyvajennuju pazicyju, pra što nieadnarazova pisała ŭ svaich sacsietkach. Pavodle źviestak ŚMI, jana publikavała spasyłku na pietycyju z patrabavańniem impičmientu prezidenta Uładzimira Pucina na płatformie change.org, fatahrafii hrašovych kupiur z antyvajennymi nadpisami i inšyja materyjały.

Jak śćviardžaje FSB, Jeŭtušenka «pravodziła ahitacyjnuju pracu», «raźmiaščała prapahandysckija materyjały, jakija stvarajuć stanoŭčy vobraz strukturnaha padraździaleńnia USU», a taksama publikavała «instrukcyi dla rasijskich vajskoŭcaŭ pa zdačy ŭ pałon».

U pačatku lipienia 2023 hoda, niezadoŭha da zatrymańnia i aryštu, Jeŭtušenka apublikavała ŭ siabie ŭ instahramie fota ź ministram ekanamičnaha raźvićcia Samarskaj vobłaści Dźmitryjem Bahdanavym: heta fatahrafija z cyrymonii ŭručeńnia dypłomaŭ vypusknikam prahramy dla maładych pradprymalnikaŭ. Jana była adnoj z udzielnic prahramy.

Jeŭtušenka ŭ ŚMI časta nazyvajuć «dziaŭčynaj ź sinimi vałasami». U hety koler, miarkujučy pa ŭsim, jana pafarbavała vałasy paśla pačatku rasijskaha ŭvarvańnia va Ukrainu. Na fota ŭ sacsietkach jana apranuta ŭ žoŭty stroj.

• 1
• 0
• 0
• 5
• 1
• 4
• 17
• 0