Biełarusy ŭzialisia ratavać francuzskuju kaviarniu ŭ centry Minska
U Minsku karystalniki sacsietak vyrašyli padtrymać nievialikuju francuzskuju kaviarniu «Bonjour u Siebaśćiana», jakuju adkryŭ francuz kala hoda tamu. Niahledziačy na toje, što ŭstanova znachodzicca ŭ centry horada, u Michajłaŭskim zavułku, i maje ŭłasnuju piakarniu z kłasičnymi francuzskimi desiertami, jaje ŭładalnik pryznaŭsia, što biznes ledź zvodzić kancy z kancami, piša Telegraf.news.
Zaklik dapamahčy kaviarni źjaviŭsia ŭ Threads. Adna minčanka apublikavała post z prapanovaj «ratavać» miesca i paraiła jaho inšym. Publikacyja chutka stała papularnaj: za paŭdnia jana nabrała bolš za 260 tysiač prahladaŭ i tysiačy łajkaŭ.
Mnohija karystalniki adznačyli, što ŭžo byvajuć u hetaj kaviarni i asabliva chvalili kruasany, jakija, na ich dumku, adny z najlepšych u horadzie. Adnak niekatorych ździvili ceny: kruasany kaštujuć ad 4,9 da 8,5 rubla, šakaładnyja bułački — ad 6,5 da 9 rubloŭ, kava — ad 6 da 9 rubloŭ, a paŭlitra harbaty — kala 10 rubloŭ.
Častka kamientataraŭ ličyć, što vypiečka daražejšaja, čym u Paryžy. Inšyja adznačajuć, što ŭ kaviarni ŭsio hatujuć na miescy ź jakasnych praduktaŭ, u adroźnieńnie ad sietkavych kram, dzie pradajuć zamarožanyja paŭfabrykaty.
Asnoŭnaj prablemaj, na dumku karystalnikaŭ, mohuć być nie ceny, a miesca. Choć adras kaviarni znachodzicca ŭ centry Minska, faktyčna jana raźmieščanaja ŭ dvary, tamu pra jaje viedajuć nie ŭsie.
U kamientaryjach prapanujuć roznyja idei, jak dapamahčy biznesu: stvaryć lepšuju šyldu, bolš aktyŭna prasoŭvać u sacsietkach, pašyrać mieniu dla studentaŭ, pravodzić tvorčyja sustrečy i ŭdzielničać u hastranamičnych fiestyvalach. Mnohija taksama paabiacali naviedać kaviarniu i padtrymać jaje.
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary
Poetomu vsio ostalnoje ostyvšieje i podhorievšieje.
Poetomu nado i spasti etot obrazčik francuzskoho stila.