Kolki biełarusaŭ hałasavała za Łukašenku na raniejšych vybarach? Apublikavanyja zakrytyja ličby dziaržaŭnych apytańniaŭ

Niezaležnaja Biełaruskaja sacyjałahičnaja hrupa prezientavała daśledavańnie «Davier u epochu pieramien: elektaralnaja historyja Biełarusi (2001-2025)». Jaho kaštoŭnaść u tym, što ŭpieršyniu apublikavanyja vyniki zakrytych daśledavańniaŭ, jakija pravodzilisia Instytutam sacyjałohii Akademii navuk Biełarusi — ab daviery da Alaksandra Łukašenki i ab uzroŭni jaho elektaralnaj padtrymki.

Nahadajem, što dziaržaŭnyja sacyjołahi pastajanna pravodziać sacyjałahičnyja apytańni, jakija vymiarajuć «uzrovień davieru» da roznych dziaržaŭnych orhanaŭ — naprykład, sudoŭ, milicyi, vojska. U tym liku vymiarajecca i davier da Alaksandra Łukašenki. Vyniki takich daśledavańniaŭ nie traplajuć u publičny dostup.

U skład Biełaruskaj sacyjałahičnaj hrupy ŭvachodzić Hienadź Koršunaŭ, jaki ŭ 2018‑2020 uznačalvaŭ Instytut sacyjałohii. Tamu zrazumieła, što ŭ jaho mahli zastacca archiŭnyja źviestki ŭstanovy.

Što varta razumieć: pierad Koršunavym — sumlennym sacyjołaham, jaki byŭ vymušany zvolnicca ŭ vieraśni 2020 hoda — ustanovu ŭznačalvali kadebist Hieorhij Javielkin (2000-2008) i zaciaty kamunist Ihar Katlaroŭ (2008-2018). Nielha vyklučać, što jany mahli karektavać vyniki daśledavańniaŭ u bolš vyhadny dla ŭładaŭ bok. Ź inšaha boku, kali vyniki takich apytańniaŭ nie publikavalisia, to łukašenkaŭcy mahli być zacikaŭlenyja ŭ atrymańni bolš-mienš realistyčnaha vyniku, chaj i z ulikam uzroŭniu strachu ŭ hramadstvie.

Čytajcie: «70% mała, davajcie 90%». Jak Špileŭskaja patrabavała ad Koršunava źmianić vyniki sacapytańnia

2001 hod

Na tych vybarach Centrvybarkam namalavaŭ Łukašenku 76%, a ŭ adzinaha kandydata ad apazicyi Uładzimira Hančaryka było 16%.

Padčas apytańnia Instytuta sacyjałohii 45% respandentaŭ skazali, što prahałasavali za Łukašenku, 11% — za Hančaryka. Aproč taho, amal pałova apytanych uchilisia ad adkazu — 13% skazali, što suprać usich, a 30% «nie mieli adkazu».

2006 hod

Pavodle padlikaŭ Instytuta sacyjałohii, uzrovień davieru Łukašenku składaŭ 50% (nie ŭkazvajecca, u jakim miesiacy pravodziłasia daśledavańnie).

Aficyjnyja padliki Centrvybarkama: Łukašenka — 83%, Milinkievič — 6%, Kazulin — 2%.

A voś apytańnie Instytuta sacyjałohii davała inšyja vyniki pa hałasach na vybarach: Łukašenka — 63%, Milinkievič — 6%, Kazulin — 1%. Adnak iznoŭ była zafiksavanaja hihanckaja kolkaść tych, chto nie choča adkazvać dziaržaŭnym sacyjołaham — 26%. I jašče 3% byli suprać usich.

2010 hod

Padrabiaznyja dadzienyja za 2010 hod jość tolki ŭ daśledavańni NISEPD prafiesara Aleha Manajeva, adnak davieru jamu niama nijakaha, tamu i analizavać hetyja źviestki niama sensu.

A voś uzrovień davieru Łukašenku, pa padlikach Instytuta sacyjałohii, składaŭ 38%. Cikava, što praz hod, u 2011 hodzie, na fonie ekanamičnaha kryzisu, jon apuściŭsia da 34%.

2015 hod

Uzrovień davieru Łukašenku ŭ hetym hodzie składaŭ 42%.

A voś padčas dziaržaŭnaha apytańnia nakont taho, za kaho prahałasavali Biełarusi, byli zafiksavanyja niezvyčajnyja vyniki.

Pavodle pieradvybarčaha apytańnia, za Łukašenku źbiralisia hałasavać 45%. Astatnija kandydaty (uklučna z Taćcianaj Karatkievič) mieli padtrymku na ŭzroŭni statystyčnaj pamyłki — nižej za 1%. Ale ažno 52% admovilisia adkazvać na pytańnie sacyjołahaŭ.

U vyniku Centrvybarkam namalavaŭ Łukašenku 84%.

2020 hod

Čytajcie: Aficyjnaja sacyjałohija: rejtynh davieru Łukašenku ŭ Minsku — 24%, Jarmošynaj — 11%

Pavodle vynikaŭ postvybarčaha dziaržaŭnaha apytańnia, za Alaksandra Łukašenku prahałasavali 21%, za Śviatłanu Cichanoŭskuju — 33%. 11% zajavili, što nie hałasavali, a jašče 26% nie zachacieli adkazvać pa pytańnie.

Tym časam Łukašenku namalavali 80%, a Cichanoŭskaj — usiaho 10%.

• 32
• 0
• 13
• 8
• 0
• 2
• 15
• 0