«70% mała, davajcie 90%». Jak Špileŭskaja patrabavała ad Koršunava źmianić vyniki sacapytańnia
Były dyrektar Instytuta sacyjałohii NANB Hienadź Koršunaŭ raskazaŭ, jak kiraŭnica Hałoŭnaha ideałahičnaha ŭpraŭleńnia administracyi Łukašenki tarhavałasia ź im adnosna vynikaŭ sacyjałahičnaha apytańnia ŭ čas COVID-19.
Hościem novaha vypusku tok-šou «Žyćcio-malina» staŭ sacyjołah Hienadź Koršunaŭ, jaki ŭ 2020-m hodzie pracavaŭ na pasadzie dyrektara Instytuta sacyjałohii Nacyjanalnaj akademii navuk Biełarusi.
U razmovie Koršunaŭ pryhadaŭ razmovu, jakaja adbyłasia ŭ 2020-m z tahačasnaj kiraŭnicaj Hałoŭnaha ideałahičnaha ŭpraŭleńnia administracyi Łukašenki Volhaj Špileŭskaj.
Pa słovach Koršunava, jon panios u administracyju Łukašenki danyja pa adnym sacyjałahičnym daśledavańni, u chodzie jakoha vyśviatlali siarod inšaha i staŭleńnie nasielnictva da mierapryjemstvaŭ uładaŭ va ŭmovach pandemii COVID-19.
«U nas nie ŭvodziŭsia łakdaŭn. I my praviali daśledavańnie, dzie zapytvalisia, što ludzi robiać, jak aceńvajuć dziaržaŭnuju palityku i hetak dalej. Kali nie pamylajusia, adsotkaŭ 70 padtrymlivali adsutnaść łakdaŭnu i kazali, što sami buduć padtrymlivać sacyjalnuju dystancyju i hetak dalej.
Ja prynios, pakazvaju: «Voś. Takija danyja. Treba drukavać». Heta była razmova sa Špileŭskaj. Jana skazała: «70 mała, davajcie 90». Kažu: «70 — heta šmat. Heta vielmi vialikaja padtrymka». Jana: «Nie-nie-nie. Napišycie 90».
Ja havaru: «Ja nie budu pisać toje, što nie adpaviadaje rečaisnaści. Voś danyja. Ich možna nadrukavać». Jana: «Pišycie 90». Ja havaru: «Ja nie budu pisać. Davajcie tady ŭvohule ničoha nie drukavać». Jana: «Nu dobra. Nie drukujcie».
Jak pryhadvaje były dyrektar Instytuta sacyjałohii, padčas razmovy Špileŭskaja pramoviła frazu kštałtu: «Ludziam nie treba ničoha viedać, treba rabić, što im skazali».
Pa słovach Koršunava, heta razmova stała dla jaho šokam, bo jon ličyŭ, što sacyjołahi pracujuć dla taho, kab ludzi viedali.
Jon śćviardžaje, što paśla jaje ŭ jaho «całkam pieraviarnułasia razumieńnie taho, čym jość biełaruskaja dziaržava i jakoje ŭ jaje staŭleńnie da ludziej».
Ciapier čytajuć
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary