Jana padaryła premjer-ministarcy Italii niezvyčajnuju karcinu.
9 sakavika Śviatłana Cichanoŭskaja była ź vizitam u Rymie i praviała sustreču z premjer-ministarkaj Italii Džordžaj Miełoni.
Cichanoŭskaja sustrełasia taksama ź ministram zamiežnych spraŭ Italii Antonia Tajani. Jany abmierkavali palityčnuju padtrymku biełaruskich demakratyčnych siłaŭ, supracoŭnictva ŭ mižnarodnych arhanizacyjach i kantakty na palach G7, a taksama humanitarnyja pytańni — padtrymku represavanych i prablemy biełarusaŭ u Italii. Śviatłana Cichanoŭskaja padkreśliła, što važna zachavać mahčymaści dla biełarusaŭ atrymlivać vizy i mieć dostup da humanitarnych prahram, i prapanavała Italii dałučycca da Mižnarodnaha humanitarnaha fondu padtrymki biełarusaŭ, paviedamlaje pres-słužba Cichanoŭskaj.
Aproč hetaha byli sustrečy z prezidentam Italii Sierdžya Matarełam, śpikieram parłamienta Łarenca Fantanam. Siarod taho, što abmiarkoŭvałasia, — dać bolš mahčymaściaŭ biełaruskim studentam, daśledčykam i maładym śpiecyjalistam udzielničać u jeŭrapiejskich i italjanskich prahramach, adukacyjnych abmienach i stypiendyjalnych inicyjatyvach.
Daradca Cichanoŭskaj Dzianis Kučynski raskazaŭ «Našaj Nivie» pra simvaličnyja padarunki, jakija pieradali italjanskamu boku.
«Italija — kraina ź vielmi mocnaj pratakolnaj kulturaj. Tamu padčas učorašnich sustreč my abmiarkoŭvali ź italjanskim bokam dypłamatyčnyja padarunki litaralna da apošnich detalaŭ», — adznačyŭ Kučynski.
Premjer-ministru Džordžyi Miełoni Cichanoŭskaja padaryła tvor Babushka biełaruskaj fotamastački Iryny Arachoŭskaj. Asnovaj pracy staŭ zdymak słynnaha fatohrafa Jana Bułhaka.
«Dla nas važna papularyzavać sučasnaje biełaruskaje mastactva i pakazvać biełaruskich aŭtaraŭ na mižnarodnym uzroŭni. Asabliva heta tyčycca mastačak, bo navat u XXI stahodździ ŭ kulturnym poli ŭsio jašče isnujuć peŭnyja stereatypy adnosna roli žančyn u mastactvie.
Ale nie mienš važny i sens samoha tvora. Jak kaža sama mastačka, praca «Babula» — heta razvažańnie pra rolu žančyny ŭ historyi Uschodniaj Jeŭropy. U mnohich hramadstvach hetaha rehijonu mienavita žančyny stahodździami brali na siabie asnoŭnuju adkaznaść za siamju i štodzionnaje žyćcio — u toj čas jak mužčyny časta sychodzili na vojny, na zarobki abo ŭ vyhnańnie. Hetaja siła i žyćciovy dośvied pakaleńniaŭ žančyn adlustravanyja ŭ vobrazie, jaki spałučaje histaryčny fotazdymak i sučasny haradski łandšaft».
Prezidentu Italii Sierdžya Matarełu padaryli italjanski pierakład ramana Sašy Filipienki «Kremulatar». A śpikieru Pałaty deputataŭ Łarenca Fantanu — kopiju słuckaha pojasa.
«Siońnia padarunak u mižnarodnych adnosinach — heta ŭžo nie prosta žest vietlivaści abo elemient pratakoła. U dobraj dypłamatyčnaj praktycy heta instrumient kulturnaj kamunikacyi i sposab raspavieści pra krainu praź simvały, historyju i sučasnuju kulturu, — tłumačyć Kučynski. —
Ja starajusia adsočvać suśvietnyja praktyki ŭ hetaj śfiery. Naprykład, Danija ź jaje znakamitymi padarunkami z Lego stała adnym z najbolš cikavych prykładaŭ kreatyŭnaj kulturnaj dypłamatyi.
Dla nas važna, kab kožny padarunak byŭ nie vypadkovym pradmietam, a nievialikim kulturnym pasłańniem. Praz takija žesty my imkniomsia pakazać Biełaruś jak krainu na skryžavańni kultur — častku jeŭrapiejskaj cyvilizacyi, jakaja maje hłybokuju historyju i žyvy sučasny kulturny praces».
Ciapier čytajuć
«Treba damaŭlacca istotna». Łukašenka raskazaŭ pra sustreču z pradstaŭnikami Zialenskaha40
«Treba damaŭlacca istotna». Łukašenka raskazaŭ pra sustreču z pradstaŭnikami Zialenskaha
«Lutaja, abraźlivaja krytyka ŭsiaho biełaruskaha. Ale ź minułaha ŭ budučyniu niemahčyma prajści mima sučasnaści». Nasievič hruntoŭna adkazaŭ Alesiu Biełamu141141
«Lutaja, abraźlivaja krytyka ŭsiaho biełaruskaha. Ale ź minułaha ŭ budučyniu niemahčyma prajści mima sučasnaści». Nasievič hruntoŭna adkazaŭ Alesiu Biełamu141
«Spačatku pahrozu prydumaŭ, potym sam jaje pieramoh». Prapahanda abviarhaje Zialenskaha, śćviardžaje, što retranślataraŭ nie zdymali, bo ich nie było3737
Kamientary