U Mahilovie źjaviŭsia «most imia Hieroja Savieckaha Sajuza M.I. Jašyna». Nazva trojčy parušaje zakanadaŭstva

Aficyjny kanał Mahiloŭskaha harvykankama paviedamiŭ, što kamisija pa tapanimicy pryniała kančatkovaje rašeńnie prysvoić mostu pa praśpiekcie Puškina hruvastkuju nazvu «most imia Hieroja Savieckaha Sajuza M.I. Jašyna». Pavodle zajaŭ čynoŭnikaŭ, bolšaść haradžan nibyta prahałasavała «za», niahledziačy na histaryčnuju nieadpaviednaść nazvy.

Aktyvisty źviartajuć uvahu na toje, što nazva źjaŭlajecca prykładam jurydyčnaha nihilizmu, bo ihnaruje adrazu try punkty patrabavańniaŭ pa najmieńni elemientaŭ vulična-darožnaj sietki. Jany byli zaćvierdžanyja pastanovaj Dziaržaŭnaha kamiteta pa majomaści jašče ŭ 2008 hodzie.

Pavialičyć

Pa-pieršaje, pastanova zabaraniaje prysvojvać elemientam vulična-darožnaj sietki nazvy, składanyja dla ŭsprymańnia, jakija źmiaščajuć šmatsłoŭnyja spałučeńni. Kanstrukcyja ź siami słoŭ, jakoj mahiloŭski čynoŭniki nazvali Dniaproŭski most — heta tapanimičny kašmar.

Pa-druhoje, dakumient nie dapuskaje vykarystańnia ŭ sučasnych nazvach archaičnyja ŭstaŭki «imia» ci «im.». Taponim musić składacca tolki z katehoryi abjekta i jaho ŭłasnaha najmieńnia.

I narešcie, narmatyŭny akt kateharyčna vyklučaje vykarystańnie inicyjałaŭ. Norma patrabuje ŭkazvać albo poŭnaje imia i proźvišča, albo tolki proźvišča histaryčnaj asoby.

Paźbiahańnie inicyjałaŭ u nazvach — źjava absalutna arhumientavanaja, bo tolki adzinki haradžan viedajuć ich dakładnuju rasšyfroŭku. Uličvajučy moŭnyja asablivaści, kali ŭ biełaruskaj i ruskaj movach adno i toje ž imia moža pačynacca na roznyja litary (Mikałaj — Nikołaj), abo na adnu i tuju ž (Ničypar — Nikifor), a za adnymi i tymi ž inicyjałami mohuć chavacca niekalki roznych imion, sproba razhadać asobu, u honar jakoj čynoŭniki dali nazvu, pieratvarajecca ŭ sapraŭdny tapanimičny kvest.

Hieahrafičnaja niestykoŭka

Akramia jurydyčnych niuansaŭ, hruvastkaja nazva aficyjna zamacoŭvaje daŭniuju hieahrafičnuju pamyłku, pra jakuju my ŭžo padrabiazna pisali raniej. Staršy lejtenant Mikałaj Jašyn sapraŭdy addaŭ žyćcio pry vyzvaleńni horada ad niemcaŭ, ale da centralnaha Dniaproŭskaha mosta jon nie mieŭ nijakaha dačynieńnia.

Pavialičyć

U kancy červienia 1944 hoda centralny most byŭ całkam razburany. Uzvod raźviedčykaŭ Jašyna farsiravaŭ raku značna vyšej pa ciačeńni, u rajonie čyhunačnaha mosta i vioski Pałavinny Łoh, u rajonie jakoj i adbyŭsia jaho apošni boj. Pryviazka proźvišča raźviedčyka da hałoŭnaj pierapravy horada ŭźnikła tolki ŭ 1964 hodzie. Tady ŭłady prosta paviesili miemaryjalnuju došku ŭ samym prystojnym miescy, jakoje źviazvaje centr horada z Zadniaproŭjem — na novym bietonnym moście, jaki pabudavali za piać hadoŭ da taho.

Historyja pierapravy ŭ hetym miescy, jakaja ŭ vyhladzie mosta isnuje z 1860 hoda, mahła b padkazać bolš dakładny taponim. Ale ŭ vyniku źjaviłasia hruvastkaja nazva na ŭzor tych, što źjaŭlalisia ŭ pieryjad savieckaha zastoju, jakaja ihnaruje jak realnuju hieahrafiju padziej, tak i biełaruskija zakony.

• 1
• 0
• 1
• 8
• 0
• 0
• 6
• 0