«Z vyvučeńniem bieśpiłotnikaŭ». Jak źmienicca dapryzyŭnaja padrychtoŭka ŭ dziesiacikłaśnikaŭ 

Vyvučeńnie bieśpiłotnych latalnych aparataŭ i taktyčnaja miedycyna ŭvojduć u abnoŭlenuju prahramu pa pradmiecie «dapryzyŭnaja i miedycynskaja padrychtoŭka» dla biełaruskich dziesiacikłaśnikaŭ u novym navučalnym hodzie. Pra heta paviedamiŭ namieśnik ministra adukacyi Alaksandr Kadłubaj, piša BiełTA.

Jak padkreśliŭ namieśnik kiraŭnika viedamstva, u novym navučalnym hodzie sistema školnaj adukacyi praciahvaje raźvivacca ŭ adpaviednaści z zadačami, pastaŭlenymi kiraŭnikom dziaržavy.

«Havorka idzie pra techničnuju karekciroŭku vučebnych płanaŭ i prahram. Novych pradmietaŭ nie dadajecca, pieraraźmierkavańnia dyscyplin pa kłasach niama. Hałoŭnaja meta siońniašnich dyjałohavych placovak — abmierkavać sa śpiecyjalistami na miescach kropkavyja momanty, jakija patrabujuć uvahi pierad pieršym vieraśnia», — rastłumačyŭ Alaksandr Kadłubaj.

Asobny akcent namieśnik ministra zrabiŭ na źmieście pradmieta «dapryzyŭnaja i miedycynskaja padrychtoŭka». U vučebnuju prahramu dziesiatych kłasaŭ uniesieny svoječasovyja i praktyka-aryjentavanyja źmieny.

«My ŭzmacnili praktyčny składnik. Dla dziesiacikłaśnikaŭ-chłopcaŭ u prahramu ŭklučany 10‑hadzinny kurs pa vyvučeńni i navykach kiravańnia bieśpiłotnymi latalnymi aparatami.U dziaŭčat istotna pašyrany praktyčny błok pa miedycynskaj padrychtoŭcy — ukaraniony elemienty taktyčnaj miedycyny. Źmianili bałans na karyść praktyčnych zaniatkaŭ i pavialičyli ich abjom. My adyšli ad čystaj teoryi da kankretnych navykaŭ, nieabchodnych u realnych umovach», — raskazaŭ namieśnik ministra.

Alaksandr Kadłubaj vysoka acaniŭ vopyt praviadzieńnia 10‑dzionnych vučebna-palavych zboraŭ dla dziesiacikłaśnikaŭ, jakija sioleta ŭpieršyniu prajšli ŭ abnoŭlenym vyjaznym farmacie na bazie vajskovych čaściej i azdaraŭlenčych ustanoŭ.

«My atrymali vyklučna stanoŭčyja vodhuki ad samich junakoŭ i kaleh ź siłavoha błoka MUS, Dziaržaŭnaha pahraničnaha kamiteta, Ministerstva pa nadzvyčajnych situacyjach i Ministerstva abarony. Asabliva ad tych chłopcaŭ, jakija prachodzili vučebna-palavyja zbory ŭ vyjaznym farmacie, a nie va ŭstanovach adukacyi. Taki farmat zabiaśpiečvaje maksimalnaje zasvajeńnie praktyčnych navykaŭ i dapamahaje zhurtavańniu kalektyvu. Uzajemadziejańnie z vajskovaj čaściu 5448 — adzin z najlepšych prykładaŭ u krainie, i svaju zadaču my bačym u tym, kab maksimalna maštabavać hety vopyt na ŭsiu Biełaruś», — padkreśliŭ pradstaŭnik Minadukacyi.

• 0
• 0
• 1
• 1
• 0
• 0
• 0
• 0